Ўзбекистон ва Қирғизистон ҳамкорликда қишлоқ хўжалиги техникаси ва енгил автомобиллар ишлаб чиқаришни ташкил этиш тўғрисидаги битим ишлаб чиқиш бўйича келишувга эришди. Бу ҳақда Инвестициялар ва ташқи савдо вазирлиги матбуот хизмати хабар берди.
Вазирликнинг маълум қилишича, Жамшид Хўжаев ва Қирғизистоннинг Ўзбекистондаги элчиси Мусо Жаманбаев учрашиб, кўп қиррали ўзбек—қирғиз ҳамкорлигининг ҳозирги ҳолати ва ривожланиш истиқболлари кўриб чиқди.
Инвестициявий ҳамкорликни ривожлантириш истиқболлари кориб чиқилди. Бугунги кунда Ўзбекистонда қирғиз капитали асосида 291 та корхона фаолият кўрсатмоқда. Томонлар икки мамлакат ҳудудида тўқимачилик, фармацевтика, қурилиш, қишлоқ хўжалиги маҳсулотларини ишлаб чиқариш соҳасидаги қўшма лойиҳалар сонини кўпайтиришга тайёр эканликларини билдирди.
Шу нуқтаи назардан, 2022—2025 йилларга мўлжалланган Савдо-иқтисодий ҳамкорлик ва саноат кооперациясини ривожлантириш дастурини, шунингдек, Қишлоқ хўжалиги техникаси ва енгил автомобиллар ишлаб чиқаришни ташкил этиш тўғ‘рисидаги битим ҳамда Дори воситалари ва тиббий буюмлар муомаласи соҳасида ҳамкорлик тўғрисида битимни ишлаб чиқиш бўйича келишувга эришилди.
Томонлар, шунингдек, шаҳар транспорти соҳасида 1,85 миллион долларлик лойиҳани молиялаштиришни бошлаган Ўзбек—Қирғиз тараққиёт жамғармаси фаолиятини муҳокама қилган. Жамғарма маблағларини жалб қилган ҳолда Қирғизистонда йигирув корхонасини ташкил этиш лойиҳасини молиялаштириш ва травертинни бирламчи қайта ишлаш лойиҳасини биргаликда амалга оширишга келишилди.
Гидроэнергетика ҳамда транспорт ва логистика соҳаларида йирик қўшма лойиҳаларни амалга оширишнинг долзарб масалалари алоҳида тартибда кўриб чиқилди.
Изоҳ (0)