«Россия тинчликнинг афзаллиги ҳақида ўйлаши учун ҳисоб-рақамларида нолни кўриши керак» — Зеленский Москвани нефть-газ даромадларидан маҳрум қилишга чақирди

Украина президенти Владимир Зеленский Европа кенгаши парламент ассамблеясида сўзлаган нутқида Европа давлатларини Россиянинг Украинага бостириб киришини молиялаштира олмаслиги учун Россия энергия манбаларидан воз кечишга чақирди, деб ёзади Meduza.

«Биз Россиянинг урушни молиялаштириш қобилиятини янада камайтириш учун келишувимизни давом эттиришимиз керак. Хусусан, тажовузкор давлатни нефть ва газ экспортидан тушадиган даромаддан маҳрум қилиш муҳим аҳамиятга эга. Россия тинчликнинг афзалликлари ҳақида ўйлаши учун ҳисоб-рақамларида нолни кўриши керак. Европа Иттифоқининг санкциялар пакетининг маъноси айнан мана шу бўлиши лозим», — деди Зеленский.

Украина президенти, шунингдек, Европа давлатларини Россиянинг Запорожье АЭСдан чиқиб кетишига мажбурлашга чақирди.

«Россия у ердан нафақат ҳарбий техникасини, балки барча жангариларини ҳам олиб чиқиб кетиши керак», — деди у.

Ундан ташқари, Зеленский Украинага ҳаво ҳужумидан мудофаа тизимларини етказиб беришга ваъда берган давлатларга алоҳида миннатдорчилик билдирди ва агар «Украина осмонини Россия терроридан ҳимоя қилиш» имкони бўлса, бу урушни тезда тугатиш учун «асосий қадам» бўлиши мумкинлигини айтди.

Зеленский Европани Россия учун махсус трибунал тузишга ва Украинага етказилган зарар учун товон ундириш механизми лойиҳасини қўллаб-қувватлашга ҳам чақирди.