Россиянинг Челябинск вилоятидан сафарбар қилинган беш киши «Донбассда махсус ҳарбий операция ҳудудида» ҳалок бўлган. Бу ҳақда шу вилоят губернатори ва маъмурияти матбуот хизматига таяниб, «74.ru» нашри хабар берган.
Марҳумларнинг барчаси Челябинск вилоятининг Коркино шаҳрида сафарбар этилган.
«Афсуски, ҳарбий комиссариат Коркино ҳарбий комиссариатидан сафарбар қилинган беш нафар жанубий уралликнинг ўлими ҳақидаги маълумотни тасдиқлади. Чуқур ва самимий ҳамдардлик изҳор этамиз», — дея маълум қилишган губернатор ва маъмурият матбуот хизматида.
Хабарда сафарбар этилганлар қаерда ва қандай вазиятда ҳалок бўлганига аниқлик киритилмаган. Шу билан бирга, матбуот хизмати қайд этишича, марҳумларнинг оилаларига сафарбар қилинганлар фронтда ҳалок бўлган тақдирда, белгиланган бошқа тўловларга қўшимча равишда, тезкор тартибда бир миллион рублдан ажратилади.
BBC ёзишича, Россия ҳукумати биринчи марта фронтда сафарбар этилганларнинг ҳалок бўлгани ҳақида расман баёнот бермоқда. Украинада нобуд бўлганлар ҳақидаги илк хабарлар шу ҳафта бошида келиб туша бошлаган, аммо ҳукумат улар юзасидан изоҳ бермаган эди.
10 октябрь куни «Вечерний Карпинск» нашри Херсон остоналарида сафарбар этилган уч киши ҳалок бўлгани ҳақида ёзганди. 12 октябрь куни «Agora» ҳуқуқни ҳимоя қилиш гуруҳи раҳбари Павел Чиков Лисичанск яқинида Петербургдан сафарбар қилинган адвокат Андрей Никифоров ҳалок бўлганини маълум қилганди.
Россияда сафарбарлик 21 сентябрь куни бошланди. Ўшандан буён, Meduza ҳисоб-китобларига кўра, сафарбар этилган, аммо фронтга жўнашга улгурмаган 20 га яқин одам вафот этган.
Изоҳ (0)