Ўзбекистонда ногиронлиги бўлган шахсларни касб-ҳунарга ўргатувчи «Имкониятлар маркази» ташкил этилади. Бу ҳақда «Дарё»га Бандлик ва меҳнат муносабатлари вазирлиги хабар берди.
Вазирлик ахборот хизмати раҳбари Мавжуда Мирзаеванинг қўшимча қилишича, бу ҳақда президент қарори қабул қилинган.Президентимизнинг «Ногиронлиги бўлган шахслар жамиятларига тегишли ташкилотларни давлат томонидан қўллаб-қувватлаш ҳамда ногиронлиги бўлган шахсларнинг бандлигига кўмаклашишга оид қўшимча чора-тадбирлар тўғрисида»ги қарорига кўра, ягона иштирокчиси ногиронлиги бўлган шахсларнинг жамоат бирлашмалари ҳисобланган юридик шахслар ишлаб чиқараётган маҳсулотларнинг кўргазма ярмаркаси доимий тарзда ўтказилади.Маълум бўлишича, 2023 йил 1 январдан бошлаб давлат харидлари доирасида тегишли ташкилотлар харид предмети ҳажмининг камида 10 фоизи миқдорида ўз ҳудудида реестрга киритилган корхоналар ишлаб чиқарган товарларни сотиб олади.Шунингдек, маҳсулотларнинг ҳажми ва техник параметрлари тўғрисидаги ахборотлар 2022 йил 15 ноябрга қадар электрон кооперасия порталига жойлаштирилади. 2023 йил 1 январга қадар эса ягона реестри юритилиши ташкил этилади, — дейди вазирлик ахборот хизмати раҳбари Мавжуда Мирзаева.
2022 йил давомида тажриба тариқасида Нукус ва Тошкент шаҳарлари ҳамда 2023 йилдан бошлаб қолган ҳудудларда «Имкониятлар маркази» фаолияти ташкил этилади. Марказ ногиронлиги бўлган шахсларнинг ҳуқуқлари ва қонуний манфаатларини ҳимоя қилиш майдони сифатида фаолият юритади. Шунингдек, бундай шахсларнинг қизиқишидан келиб чиққан ҳолда касб-ҳунарга ўқитишга кўмаклашади, — дейди Мирзаева хоним.
Изоҳ (0)