«Дарё»да Қашқадарё вилоятининг Чироқчи туманида туғилган чақалоқ даволаниш учун Самарқанд шаҳридаги шифохонага олиб борилгани ва шифохонада дом-даракциз йўқолгани ҳақида мақола эълон қилинганди. Бу ҳақда таҳририятга такроран мурожаат қилган эр-хотин — Зиёда Жовлиева ҳамда Отабек Рўзимов тергов ҳаракатлари якунланганини, фарзандининг тирик ёки ўликлиги мавҳумлигича қолиб кетаётганини айтганди.
Эр-хотиннинг мазкур видеочиқишидан сўнг Бош прокуратура ахборот хизмати мурожаат назоратга олинганини, ҳолат ҳақида батафсил маълумот берилишини билдирганди.
Бош прокуратура ахборот хизмати мазкур ҳолат бўйича қўшимча маълумот бериб, дастлабки терговда ҳолатларга етарлича эътибор қаратилмагани боис тергов органи қарори бекор қилиниб, 12 октябрь куни қўшимча тергов ҳаракатлари бошланганини маълум қилди.
Мазкур ҳолат бўйича Самарқанд шаҳар ИИО ФМБ ҳузуридаги Тергов бўлими томонидан Жиноят кодексининг 124-моддаси билан жиноят иши қўзғатилиб, дастлабки тергов ҳаракатлари олиб борилган. Жиноят иши бўйича олиб борилган дастлабки тергов ҳаракатлари натижасига кўра, ҳаракатдан тугатилган.Ушбу қарор ва иш ҳужжатлари Самарқанд вилояти прокуратураси томонидан ўрганилганида, барча ҳолатларга ҳуқуқий баҳо берилмасдан, барвақт қарор қабул қилинганлиги боис, 2022 йил 12 октябрь куни қарор бекор қилиниб, қўшимча тергов ҳаракатлари ўтказиш учун шаҳар ИИО ФМБ ҳузуридаги Тергов бўлимига юборилди, — дейилади Бош прокуратура ахборот хизмати хабарида.
Изоҳ (0)