Тошкент вилоятидаги назоратдаги ижтимоий соҳа объектларининг ярмидан кўпи берилган мажбурий кўрсатмаларни бажармаган. Бу ҳақда, бугун, 13-октябр куни бўлиб ўтган Ўзбекистонни барқарор ривожлантириш соҳасидаги миллий мақсадлар ва вазифаларнинг 2030 йилгача бўлган даврда амалга оширилишини назорат қилиш бўйича Парламент комиссияси йиғилишида сенатор Борий Алиханов маълум қилди.
Анжуманда Парламент комиссияси аъзоси Борий Алиханов аниқланган чиқиндилар ва уларни қайта ишлаш борасидаги муаммоларга тўхталиб ўтди:
Вилоятлардаги мавжуд чиқинди полигонларининг аксарияти санитар - экологик талабларга жавоб бермайди. Бир нечта полигонларда дизбарьерлар мавжуд эмас. Шунингдек, санитар-эпидемиологик хавфсизликни таъминлаш учун уларнинг атрофлари ўралмаган, ёнғиндан сақланиш чоралари кўрилмаганлиги сабабли полигонларда кўплаб ёнғинлар содир бўлмоқда.Қўшимча қилинишича, чиқиндиларни бошқариш бўйича давлат экологик назорати самарадорлигини таъминлаш ҳам етарли даражада эмас. Жумладан, жорий йилнинг 9 ой ҳолати бўйича белгиланган жарималарнинг ундирилиш кўрсаткичи Тошкент вилояти бўйича 54 фоизни, Бухоро вилояти бўйича эса 60 фоизни ташкил этди. Тошкент вилоятидаги назоратдаги 2 минг 689 та ижтимоий соҳа объектларидан 1 минг 542 таси берилган мажбурий кўрсатмаларни бажармаган. Бухоро вилояти бўйича эса бу кўрсаткич мутаносиб равишда 1 минг 135 та ва 960 тани ташкил этади.ҳудудларда қурилиш, ишлаб чиқариш, тиббий ва бошқа зарарли чиқиндиларни тўплаш, саралаш, чуқур қайта ишлаш ва утилизация қилиш ишлари умуман талабга жавоб бермайди. Шу туфайли ушбу чиқиндиларнинг аксарияти маиший чиқинди полигонларига жойлаштирилмоқда.
Ҳудудларда санитар-эпидемиологик осойишталикни таъминлаш учун тиббиёт чиқиндиларини алоҳида тўплаш ва утилизация қилиш масаласи тўлақонли ҳал этилмаган.
Вилоятлардаги айрим шифохона ва бошқа тиббиёт муассасаларида тиббий биологик ва патологоанатомик чиқиндиларни зарарсизлантирадиган ва кўмадиган махсус ўралар талаб даражасида ташкил этилмаган.
Тиббиёт муассасаларида ҳосил бўладиган радиологик чиқиндилар, жумладан рентген хоналарда ҳосил бўладиган реагентлар, плёнкалар, термометрлар ва бошқа зарарли чиқиндиларни белгиланган тартибда йўқ қилишга ихтисослашган шохобчалар ташкил этилмаган.
Тиббиёт ташкилотларининг харажатлар сметасида бундай чиқиндиларни утилизация қилиш учун маблағлар кўзда тутилмаган.
Ҳудудларда қурилиш чиқиндиларини алоҳида тўплаш, қайта ишлаш ва жойлаштириш ишлари ҳам талабга жавоб бермайди.
Вилоятларда 2022 йилга қадар қурилиш чиқиндилари полигонлари ташкил этилмаганлиги, Архитектура-шаҳарсозлик кенгаши хулосаларида турар-жой бинолари қурилиши учун ажратилган ер майдонлари таркибида чиқиндиларни вақтинча жойлаштириш майдончалари қурилиши кўзда тутилмаганлиги сабабли назорат идораларига аҳоли мурожаатлари ортган".
Аввалроқ, Бухоро ва Тошкент вилоятлари аҳолисининг чиқиндидан 70 миллиард сўм дебитор қарздорлиги борлиги ҳақида хабар берилган эди.
Изоҳ (0)