Украина чегарасидан 33 километр нарида жойлашган Россиянинг Белгород вилоятига бомбалар ёғдиришда давом этмоқда. Бугун, 13 октябрь куни ҳам шаҳарнинг Губкин кўчасидаги турар жой биносига бомба парчалари тушган.
Бир неча кун аввал Белгород вилояти ҳудудида жойлашган Белгород давлат техника университетининг ўзбекистонлик талабаларидан мурожаат келиб тушди. Улар шаҳардаги ижтимоий аҳвол, уруш фонида ўзгарган яшаш тарзи ҳамда ҳар куни эшитилиб турадиган бомба овозлари ҳақида сўзлаб берган эди.
Ҳозирги кунда Владимир Шухов номидаги Белгород давлат техника университетида 150 га яқин Ўзбекистон фуқароси таҳсил олади.
Талабалардан бирининг «Дарё»га айтишича, бугун, 13 октябрь куни улар яшаётган ётоқхонадан тахминан 2,5 километр узоқликдаги бинога бомба тушган.
«Ҳамма ваҳимада. Кимдир ўлса кейин ёрдам беришса керак. Нима қилишни билмай ўтирибмиз. Элчихонадагилар вазиятдан хабардор. Лекин ҳали бирор кўрсатма ёки қандайдир ёрдам беришгани йўқ. Телефон қилсак вазият ўрганилаётганини айтишди», — деди талаба йигит.
Унинг қўшимча қилишича, талабаларнинг ўқишни Ўзбекистонга кўчириш учун университетнинг Ўзбекистондаги филиалига мурожаат қилинган, буни ҳал қилиш уларнинг қўлида эмаслигини айтишган.
«Ўқиш онлайн бўляпти. Ҳамма ётоқхонада жон сақлаб ўтирибди. Деканимиз онлайн ўқиш тартиби чўзилиши мумкин, юртларингга кетсаларинг ҳам майли, деб айтди», — деди талаба.
Белгородда ҳаво ҳужумидан мудофаа тизими ишламоқда
Белгород вилояти ҳукуматининг тезкор штабида айтилишича, портлашлар ва ҳаво мудофааси натижасида бир нечта кўчаларда автомобиль ва йўл қопламаси «бироз шикастланган». Шунингдек, уйлар яқинида, ҳовлиларда ва хусусий уйнинг иссиқхонасида снаряд парчалари топилган.
Курск вилоятидаги ўзбекистонликларнинг Шавкат Мирзиёевга мурожаати
11 октябрь куни Россиянинг Курск вилоятида ўқиётган ўзбекистонлик талабалар Украинага чегарадош ҳудудларда хавф тобора ортиб бораётгани сабаб президент Шавкат Мирзиёевга мурожаат билан чиқди. Улар шаҳардаги аҳвол нотинч эканини айтиб, давлат раҳбаридан уларнинг ўқишини Ўзбекистонга кўчириб беришни сўраган.
«Биз ўзимиздан ўзимиз ваҳима кўтараётганимиз йўқ. Чунки ҳали бу ерлардаги вазият унчалик нотинч бўлмаган пайтлардаёқ, март ойида Қозоғистон ҳукумати ўз фуқароларини эвакуация қилиб, ўқишларини ўзларига кўчириб берганди. Биз эса вазият сал хавотирли тус олаётган вақтда мурожаат қиляпмиз. Ҳурматли президент, бизнинг ўқишимизни Ўзбекистондаги тиббиёт олийгоҳларига кўчиришингизни илтимос қиламиз», — деган талабалар номидан сўзга чиққан йигит.
ТИВ ва ниҳоят тилга кирди
Ташқи ишлар вазирлиги ҳолатга муносабат билдирди. Қайд этилишича, талабаларнинг мурожаати юзасидан Ўзбекистон элчихонаси дипломатлари вазиятни ўрганиш ва мавжуд муаммоларни ҳал қилиш мақсадида Курск вилоятига жўнаб кетган.Натижалар тўғрисида қўшимча ахборот берилади.
Изоҳ (0)