Мбаппе ўзини ёлғон ваъдалар ва сиёсий босим қурбони бўлгандек ҳис қилмоқда. У ёзда «ПСЖ»ни тарк этиши мумкин
«ПСЖ» қишда Килиан Мбаппени қўйиб юбориш истагида эмас.
Аввалроқ ҳужумчи Париж клуби унга сотқинлик қилгани, шунинг учун яқинлашиб келаётган трансфер ойнасида жамоани тарк этмоқчи эканлиги хабар қилинганди.
CBS Sports журналисти Бен Жейкобснинг хабарига кўра, парижликлар мавсум оралиғида эмас, ёзги трансфер ойнасида Мбаппени сотиш ҳақида ўйламоқда.
Килиан ўзини ёлғон ваъдалар ва сиёсий босим қурбони бўлгандек ҳис қилмоқда. У пулга эътибор қаратмасдан, ўзига мос муҳитда футбол ўйнашга интилмоқда.
Мбаппе клубдаги вазиятдан норози, Ҳелайфи унга берган ваъдаларини бажармаган, дейди Get French Football News.
Килианга ёзда марказий ҳужумчи билан шартнома имзолаш ваъда қилинган, бироқ ушбу позицияга ҳеч ким олиб келинмади. Ундан ташқари Мбаппега мураббий Кристоф Гальтьенинг 3-4-3 тактикаси ёқмаяпти, бундай ўйин тизими Неймар ва Месси ўзининг энг яхши сифатларини намойиш этиши учун имконият беради, Мбаппега эса йўқ.
23 ёшли футболчи жорий мавсум «ПСЖ»нинг 13 та ўйинида иштирок этиб, 12 та голга муаллифлик қилди.
