Тошкентда 14—16 ноябрь кунлари ЮНЕСКО шафелигида «Эрта ёшдаги болаларни тарбиялаш ва таълим бериш бўйича бутунжаҳон халқаро конференцияси» ўтказилади. Ушбу тадбир ҳақида оммага кенгроқ маълумот бериш мақсадида Мактабгача таълим вазирлиги журналистлар учун пресс-нонушта уюштирди. Бу ҳақда «Дарё» мухбири хабар берди. Ноанъанавий тарзда кечган суҳбат аввалида вазир Агриппина Шин сўз олди.
Бугун сизлар билан мана шундай дўстона, норасмий муҳитда фикр алмашиш, мактабгача таълим соҳасида жамиятимиз, биз, ОАВ ҳамда энг аввало ота-оналарни қизиқтирадиган саволларга самимий жавоб бериш учун йиғилдик. Бугун, шунингдек, асосий эътибор қаратадиган мазвумиз, шубҳасиз, «Эрта ёшдаги болаларни тарбиялаш ва таълим бериш бўйича бутунжаҳон конференцияси» саналади. Бу, албатта, жуда қизиқарли ҳамда муҳим тадбир ҳисобланади. Унда 193 мамлакат таълим вазирлари, халқаро ташкилотлар, молия институтларининг раҳбарлари, экспертлари, фан ва таълим соҳаси арбоблари, Нобель мукофоти лауреатлари ҳам онлайн ва оффлайн тарзда, жами 1500 нафар иштирокчилар қатнашиши кўзда тутилмоқда.Вазир, шу билан бирга, Нью-Йоркда, юқори минбарларда, Бирлашган Миллатлар Ташкилоти бош котиби Антониу Гутерриш томонидан таълим соҳасидаги трансформацияларда энг асосий бўғин мактабгача таълим йўналиши экани айтилгани, бугунги кунда мамлакатда соҳани ривожлантиришга нафақат масъул ташкилотлар, балки жамиятнинг ҳар бир қатлами жавобгар эканини таъкидлади. «Таълимга сармоя нафақат давлат, балки ҳар бир оила учун муҳим. Ўзбекистон болалар каби муҳим инсон ресурсига эга. Йилдан йилга туғилиш кўрсаткичлари ошиб бораётгани 15-20 йилдан сўнг бизда инсон ресурсининг ошиши ижтимоий-иқтисодий тараққиёт юз беришига омил бўлиши мумкин», дейди вазир Агриппина Шин.Агриппина Шин, Мактабгача таълим вазири
Бутунжаҳон халқаро конференция амбассадори этиб танланган санъаткор Лола Йўлдошева ҳам тадбирда ўз фикрлари билан ўртоқлашди.
Менга билдирилган ишонч, ушбу глобал миссиянинг ижрочиси бўлишдек масъулият топширилгани учун барчага ташаккур билдираман. Аввало мен ҳам 3 нафар боланинг онасиман ва ҳозир кенжатой қизим ўзининг илк сабоқларини олишни бошламоқда. Ўйлайманки, ҳар бир ота-она учун фарзанди таълим, илк кўникмалар ҳамда жамиятга мослашиш жараёнини муносиб эгаллаётганини билиш муҳим. Менинг амбассадор сифатидаги фаолиятим Ўзбекистоннинг барча мактабгача таълим ёшидаги болажонларининг ота-оналарига ишонч бағишлашига умид қиламан. Бундай даражадаги конференциялардаги иштироким аудиторияни мактабгача таълим нақадар муҳим эканлигини ишонтиришимга кўмаклашади, деб ўйлайман. 1000 дан ортиқ таълим мутахассислар қатнашадиган тадбир бизга мактабгача таълимни янада сифатли, оммабоп ҳамда долзарб даражага кўтаришга минглаб имконият тақдим этади.Лола Йўлдошева, Бутунжаҳон халқаро конференция амбассадори
Норасмий руҳдаги учрашувда Бутунжаҳон халқаро конференция якуни бўйича 2030 йилгача мактабгача таълим соҳасидаги халқаро кун тартибини белгиловчи Тошкент декларацияси қабул қилиниши айтиб ўтилди.
Тадбир дастури инклюзивлик, сифат ва фаровонлик, педагоглар ва ECCE ходимлари, молия, сиёсат ва менежмент ҳамда дастурий таъминот инновацияси каби тўртта асосий мавзуга асосланади. Унинг доирасида юқори даражадаги ялпи мажлислар, параллел сессиялар ва фотокўргазма, маданий ҳамда қўшимча тадбирлар ташкил қилинади.
Изоҳ (0)