Maktabgacha ta’lim vazirligi jurnalistlar bilan noan’anaviy uchrashuvda butunjahon xalqaro konferensiya ambassadorini tanishtirdi

Toshkentda 14—16-noyabr kunlari YUNESKO shafeligida “Erta yoshdagi bolalarni tarbiyalash va ta’lim berish bo‘yicha butunjahon xalqaro konferensiyasi” o‘tkaziladi. Ushbu tadbir haqida ommaga kengroq ma’lumot berish maqsadida Maktabgacha ta’lim vazirligi jurnalistlar uchun press-nonushta uyushtirdi. Bu haqda “Daryo” muxbiri xabar berdi. Noan’anaviy tarzda kechgan suhbat avvalida vazir Agrippina Shin so‘z oldi.

Bugun sizlar bilan mana shunday do‘stona, norasmiy muhitda fikr almashish, maktabgacha ta’lim sohasida jamiyatimiz, biz, OAV hamda eng avvalo ota-onalarni qiziqtiradigan savollarga samimiy javob berish uchun yig‘ildik. Bugun, shuningdek, asosiy e’tibor qaratadigan mazvumiz, shubhasiz, “Erta yoshdagi bolalarni tarbiyalash va ta’lim berish bo‘yicha butunjahon konferensiyasi” sanaladi. Bu, albatta, juda qiziqarli hamda muhim tadbir hisoblanadi. Unda 193 mamlakat ta’lim vazirlari, xalqaro tashkilotlar, moliya institutlarining rahbarlari, ekspertlari, fan va ta’lim sohasi arboblari, Nobel mukofoti laureatlari ham onlayn va offlayn tarzda, jami 1500 nafar ishtirokchilar qatnashishi ko‘zda tutilmoqda.

Agrippina Shin, Maktabgacha ta’lim vaziri 

Vazir, shu bilan birga, Nyu-Yorkda, yuqori minbarlarda, Birlashgan Millatlar Tashkiloti bosh kotibi Antoniu Guterrish tomonidan ta’lim sohasidagi transformatsiyalarda eng asosiy bo‘g‘in maktabgacha ta’lim yo‘nalishi ekani aytilgani, bugungi kunda mamlakatda sohani rivojlantirishga nafaqat mas’ul tashkilotlar, balki jamiyatning har bir qatlami javobgar ekanini ta’kidladi. “Ta’limga sarmoya nafaqat davlat, balki har bir oila uchun muhim. O‘zbekiston bolalar kabi muhim inson resursiga ega. Yildan yilga tug‘ilish ko‘rsatkichlari oshib borayotgani 15-20 yildan so‘ng bizda inson resursining oshishi ijtimoiy-iqtisodiy taraqqiyot yuz berishiga omil bo‘lishi mumkin”, deydi vazir Agrippina Shin.

Butunjahon xalqaro konferensiya ambassadori etib tanlangan san’atkor Lola Yo‘ldosheva ham tadbirda o‘z fikrlari bilan o‘rtoqlashdi.

Menga bildirilgan ishonch, ushbu global missiyaning ijrochisi bo‘lishdek mas’uliyat topshirilgani uchun barchaga tashakkur bildiraman. Avvalo men ham 3 nafar bolaning onasiman va hozir kenjatoy qizim o‘zining ilk saboqlarini olishni boshlamoqda. O‘ylaymanki, har bir ota-ona uchun farzandi ta’lim, ilk ko‘nikmalar hamda jamiyatga moslashish jarayonini munosib egallayotganini bilish muhim. Mening ambassador sifatidagi faoliyatim O‘zbekistonning barcha maktabgacha ta’lim yoshidagi bolajonlarining ota-onalariga ishonch bag‘ishlashiga umid qilaman. Bunday darajadagi konferensiyalardagi ishtirokim auditoriyani maktabgacha ta’lim naqadar muhim ekanligini ishontirishimga ko‘maklashadi, deb o‘ylayman. 1000 dan ortiq ta’lim mutaxassislar qatnashadigan tadbir bizga maktabgacha ta’limni yanada sifatli, ommabop hamda dolzarb darajaga ko‘tarishga minglab imkoniyat taqdim etadi.Lola Yo‘ldosheva, Butunjahon xalqaro konferensiya ambassadori

Norasmiy ruhdagi uchrashuvda Butunjahon xalqaro konferensiya yakuni bo‘yicha 2030-yilgacha maktabgacha ta’lim sohasidagi xalqaro kun tartibini belgilovchi Toshkent deklaratsiyasi qabul qilinishi aytib o‘tildi.

Tadbir dasturi inklyuzivlik, sifat va farovonlik, pedagoglar va ECCE xodimlari, moliya, siyosat va menejment hamda dasturiy ta’minot innovatsiyasi kabi to‘rtta asosiy mavzuga asoslanadi. Uning doirasida yuqori darajadagi yalpi majlislar, parallel sessiyalar va fotoko‘rgazma, madaniy hamda qo‘shimcha tadbirlar tashkil qilinadi.