Қорақалпоғистонда шифокор 76 ёшли ҳамкасбининг банк картасидан 4 млн сўм ўғирлаб, онлайн қиморга сарфлади

Қорақалпоғистоннинг Тахтакўпир туманида шифокор кекса ҳамкасбининг пластик картасидаги пулларини ўғирлади. Бу ҳақда Ички ишлар вазирлиги Киберхавфсизлик маркази хабар берди.

Қайд этилишича, 76 ёшли шифокор Ж.А. ариза билан мурожаат қилиб, номаълум шахс унинг банк картасидан жами 4 миллион 45 минг сўм пулларини ечиб олганини билдирган. Тезкор-қидирув тадбирлари давомида Ж.А.нинг банк картасидан пулларни ечиб олган шахс унинг ҳамкасби — Тахтакўпир туманида яшовчи, поликлиникада ишловчи 31 ёшли шифокор Е.Н. экани аниқланган.

У онлайн таваккалчиликка асосланган «1хбет» ўйинларига берилиб кетгани сабабли ҳамкасбининг кексалигидан фойдаланиб, унинг банк картаси бошқарувини ўзининг телефонидаги мобил иловасига ўтказиб олиш орқали пулларни ўзлаштирган.

Е.Н.га нисбатан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари олиб борилмоқда.