АҚШда истиқомат қилаётган хонанда Собиржон Мўминов номақбул ишлар ортидан танилаётган инсонлар, унга пиар таклифлари бўлгани, ижодни бошланган пайтида қўшиқ чиқариш учун бир йиллаб навбатда тургани, ўзига, оиласига қилинган душманликлар ва ҳаётидаги йўқотишлари ҳақида гапирди.
«Уйида қилмайдиган ишини чиқиб оммага кўрсатяпти»
«Муносиб инсонларнинг авлодларимиз, шунинг учун баъзи бир бачканаликларни, ижтимоий тармоқлардаги ҳар хил қилиқларни танилиш учун қилишяпти. Танилиш осон, суюкли бўлиш қийин. Танилиш, мана қора пиар билан ҳам таниляпти. Вақтинча исми айтилиб турилибди, холос. Шунга кетказган вақтини ўрнига кичкина, яхши нарса қилиш билан танилса бўлмайдими, дегингиз келади. Ижтимоий тармоқларга ҳам ёзиб қўйдим, шуни ўрнига нафақат ўзингни ўйла, балки ортингда халқ, миллат турибди. Бунақа бачканалик билан халқимизнинг шаънини ерга ураяпти.
Нафақат санъат соҳасида, балки бошқа соҳада ҳам ўзига ярашмаган ишларни қилиш авж олиб кетди. Бу нарса ачинарли ҳолат. Бошқаларни ҳам кўряпмиз, ижтмоий тармоқларда ўзига ярашмайдиган қилиқларни қиляпти. Мен бу нарсага доим жон куйдириб қараганман. Бачканалик билан танилиш бўлмайди, бари бир бу нарсаларнинг охири вой. Ундан кўра ўшанга кетказган вақтини яхши, кичкина нарсага сарфласа кимдир манфаатдор бўлади, кимлардир шундан фойдаланади, ортидан дуо қилади.
Лекин пандемия пайтида бачкана қилиқ қилиб чиққанларни қачонки, ким кўрса ортидан кулади. У нарса яхшиликка олиб келмайди, миллатнинг мавқейини пастга туширади. Ҳар бир инсон, ҳар бир касб эгаси ўзининг билим доирасида миллатни, халқни мавқейини кўтариши керак, қаерда бўлишидан қатъи назар. Санъат, биров нақш ясаб санъатини кўрсатади, биров тикиш билан, шу санъат даражасига етиши керак. Бачканалик, у ҳаттоки уйида қилмайдиган ишини чиқиб оммага кўрсатяпти», — дейди хонанда.
Собиржон Мўминов унга пиар қилиш борасида таклифлар бўлгани ҳақида
«Менга ҳам бир қанча пиар вариантларини таклиф қилишди. Ҳар хил, шов-шув бўладиган газеталарда, экранларда, радиода, телевидениеда ҳам ҳар хил журналистлар, ‘шоумен’лар чиқиб қолади. Менинг фарзандларимга ҳам бу нарсани кўп таклиф қилишди, ҳар доим рад қилганман. Чунки бу танилишнинг охири ҳам бор, таниқли бўлиш осон, уни ичида қанча қарғиш-у, кулги ва нафрат бўлади. Лекин яхшиликни уруғи кам бўлади, уни натижаси, унуми чиройли бўлади. Шунинг учун доим айтаман, яхши нарса билан танилса, у ҳам ҳавасли бўлади, ҳам ортидан дуо қилишади, ҳам ўзига хос тарзда бир неча йиллар давомида ундан кимдир фойдаланади. Таниқлиликни эмас, инсонийлигини ҳурмат қилиш керак», — дейди Собиржон Мўминов.
«Бадиий кенгашда олти ойлаб, бир йиллаб навбатга турар эдик»
«Жуда ҳам кучли бадиий кенгаш бўларди, бадиий кенгашда олти ойлаб, бир йиллаб навбатга турар эдик, исмимиз ёзиб қўйилар эди. Навбатма-навбат кутардик, қайсидир ойда бадиий кенгашга ўзимимизнинг маҳоратимизни кўрсатишга кирардик, у телевидениенинг ичида бўлар эди. Бадиий кенгашда Фаттоҳхон Мамадалиев, Орифхон Ҳотамов, Ғанижон Тошматов, буюк шоирлар, энг кичиги Абдуҳошим Исмоилов бўлган. Жуда ҳам кучли бадиий кенгаш бўлган, унча-мунча қўшиқ, куй ўтказилмас эди, агар оҳанг кимникидир билан ўхшаб қолса, яна бир қараб келинг, деб яхши гапириб чиқариб юборишар эди.
Кейин яна бир йил навбатда туриш керак эди, яна бир йил турмаслик учун ҳеч кимникига ўхшамаган, оригинал нарса қилиб бориш керак эди. Шунинг ҳар битта ижодкорни ифори бўлган, ҳозир боғда бир хил гуллар кўпайиб кетган. Олдин бу боғда ҳар хил гуллар: лола, атиргул, бинафша очилган, унинг ўз ифори бўлган. Ҳаттоки бирорта хонанда телеэкран орқали чиқиш қилаётган бўлса, мусиқасидан ким чиқаётганини билиш даражасида бўлган. Чунки ансамблдаги созандаларнинг фарқи ҳам шунда эди, бир-бирига ўхшамаган бўларди. Шунинг учун ҳамма қарсак чаларди, кучли маҳсулотлар бўлган. Ҳозир ҳам тобора яхшилашяпти, бироқ бир хиллик кўп. Ҳозирги ёшлар орасида бунинг фарқига бораётганлари ҳам бор, яхши нарсани уруғи кам бўлади. Бунга фаросат, илм-зиё керак», — дейди хонанда.
«Иссиқ-совуқ»ни ҳам қилишди, машиналаримизга, уйимизга ҳам ташлаб кетишган
«Ҳаётда бизга нисбатан одамлар томонидан тушуниб-тушунилмай қилинган барча ёмонликларини кўрдик. Кўролмасликларни ҳам кўрдик, уни айтиб достон қилишга ҳожат йўқ. Буларни биз умумий қилиб, Аллоҳни синови, шу синовлардан чиройли ўтказганига шукр, деган хулосага келганмиз. Жуда ҳам кўп, эсласам баъзи инсонлардан нафратланишим мумкин, баъзиларига яхши ҳам шу душман бор, мен бу нарсани кучайтирганман деганман. Сизга душманлик ҳолда, ўзи билмаган ҳолда яхшилик қилиб қўйган бўлади. Сизни кучайишингизга, ижод қилишингизга, изланишингизга сабабчи бўлади.
У сизга мазза қилиб душманлик, лекин Аллоҳ сизга уни орқасидан чиройли натижаларга эриштиради. У яна давом эттиради, сизни тушиб кэтсин бошқа чуқурлар қазиб, тузоқлар қўйиб қўяди. Лекин кўнглингиз Аллоҳга тўғри бўлгани учун сизни синовларда асраб олиб чиқиб, яна мукофотлаб ҳам қўяди. Ҳалиги инсон қалби қоралигидан ўзи баттар жазавага тушиб қолиб кетади. Буларнинг барчасидан ўтдик. Ҳаттоки бизнинг динимизда қораланган ‘иссиқ-совуқ’ни ҳам қилишди, машиналаримизга, уйимизга ҳам ташлаб кетишган. Уйимизга кўп одам чақираман, пардаларимизга нина, тирноқ, нима бўлса қистириб кетишган. Қилмаган душманликлари қолмаган, ҳаттоки авария ҳам қилишган. Ҳар хил нарсалар бўлган», — дейди Собиржон Мўминов.
«Бир-биримизга душманлик қилаверсак, миллат ривожланмайди»
«Ўн йил олдин қанақа эдик, қанчалик даражада тез ўтди бу умр, бундан буёғи ундан ҳам тез ўтади. Буни орасида мен сизга, сиз менга ёмонлик қилишимизнинг нима фойдаси бор? Имкон қадар бир-биримизнинг дуомизни олиб, яхшилик қилишимиз керак. Шунда халқ, юрт, Ватан инсонлар ривожланади, бир-биримизга душманлик қилаверсак, бир-биримизни синдираверсак фақат орқага қараб кетамиз. Агар бир-биримизга кўмак бериб, тиргак бўлсак, билмаган нарсаларимизни ўргацак тобора юксакликка қараб кетамиз.
Бунда халқ, миллат ривожланади. Биз эса нимага мен эмас, у бўлиши керак деб нафсимизга қул бўлаяпмиз. Аллоҳ тепадан қараб турибди, арзимаган нарса учун гуноҳга ботишингни қара, деб тургандек гўё. Менга эса қўлимдан келса сизга ёрдам берай, сиз менга ёрдам беринг, билмаганимни ўрганай дейиш керак. Халқимизни, юртимизни ривожлантирамиз, инсон учун ҳамма нарса зўр бўлади. Бир-биримизга душманлик қилаверсак, миллат ривожланмайди», — дейди хонанда.
«Онам ёшлигимда дунёдан ўтган, бу катта йўқотиш. Орзуларимиз, ёшликда бирга қилган ниятларимиз, онамга қилинган ваъдалар, буларнинг ҳаммаси ҳалигача юрагимнинг туб-тубида армон бўлиб ётибди. У ҳар лаҳзада ўзининг таъсирини кўрсатади. Баъзан ота-онадан маслаҳат сўрагингиз келади, қарасангиз улар ўзининг жойида йўқ. Афсусланасиз, бу жуда катта, ўрнини тўлдириб бўлмайдиган йўқотиш бўлади. Ҳаётимизда энг катта фарзандим қизим бўлган, у ҳам икки ойлигида вафот этган, бу ҳам катта йўқотиш бўлган. Бизга берилаётган кўп яхшиликларни тўсиб, қайтариб қолишган, у ҳам катта йўқотиш. Биз буларнинг ҳаммасини Яратганнинг синови деб хулоса ва сабр қиляпмиз. Ота-онани йўқотиш ҳам катта синов бўлгани учун, у ҳам мени ҳаётда анча довдиратиб қўйган. Ҳозир фарзандларимиз катта бўлган, улар билан овуниб, ҳар қандай ҳолатда ҳам фарзандларим учун намуна бўлиб тик тура олишимиз керак, Ё, Раббий бизни фарзандларимизнинг олдида куч-қудрат бўлиб туришимизга ўзинг куч бергин, деб сўраб шунга ҳаракат қилганмиз. Сабр билан давом этиб келяпмиз», — дейди Собиржон Мўминов.
Мавзуга доир:
- Instagram: Собиржон Мўминов ўғилларининг тўйи гала концертга айланди, Динейра она бўлди, Ҳалима Ибрагимова хонадонида байрам.
- Instagram: Шоҳруххон ва Асал Шодиева хонадонида байрам, бир кунда 3 ўғлини уйлантирган Собиржон Мўминов, Раъно Ярашева оиласида жудолик.
- Собиржон Мўминов АҚШга кўчиб кетиши сабаби ва у ерда нима иш билан шуғулланаётгани ҳақида сўзлаб берди.
Изоҳ (0)