10 октябрь куни АҚШдаги энг йирик аэропортларнинг баъзиларига хакерлар ҳужум уюштирди, деб хабар беради «Интерфакс».
Илк киберҳужумлар Нью-Йоркдаги Ла-Гуардия аэропортига нисбатан амалга оширилган. Кейинроқ мутахассислар Лос-Анжелес халқаро аэропорти ва Чикагодаги ЎХара халқаро аэропорти сайтларида ҳам носозликларни қайд этган.
Ҳужумлар туфайли, аэропортларда гавжумлик ва кутиш вақти ҳақида ахборот берувчи сайтлар фаолияти бузилган. Бироқ хакерларнинг хатти-ҳаракатлари ҳаво ҳаракати бошқаруви, транспорт хавфсизлиги ва самолётлар билан алоқа линияларига таъсир ўтказгани йўқ.
CNN телеканали қайд этишича, 14 та аэропортлар сайтларининг ишдан чиқишига Killnet хакерлар гуруҳи сабабчидир.
9 октябрь куни, аэропортларга киберҳужумдан бир кун аввал, ўзини КиллМилк деб таништирган Killnet гуруҳи асосчиси билан интервью эълон қилинганди. У АҚШни «ҳаракатларимизнинг сўнгги ҳомийси» деб атаганди. «Саккиз ой давомида биз Европани ўргандик ва синдирдик, бу вақтда АҚШ биз билан учрашувга тайёрланди. Биз Америка кибермаконида ижод қилишни энди-энди бошлаяпмиз», — деди хакер.
Килл Милк ўзини Россиянинг қонунга риоя қиладиган фуқароси деб атади ва гуруҳнинг асосий мақсади «душманга муносиб жавоб бериш ва ер юзидаги тинчлик»дан иборат эканини айтди.
Killnet хакерлари аввал ҳам Ғарб мамлакатлари тармоқ инфратузилмасини бузишда айбланган. Хусусан, июлда Литванинг ЭСО давлат энергия компанияси, августда эса Американинг Lockheed Martin компанияси зарар кўрганди. Lockheed Martin бошқа нарсалар билан бир қаторда, Украинага етказиб берилувчи HIMARS баравар ўт очиш реактив тизимлари ва Javelin танкка қарши ракета мажмуаларини ишлаб чиқаради.
Изоҳ (0)