Қатар пойтахти Дохада АҚШ президенти Жо Байден маъмуриятининг юқори мансабли амалдорлари ва «Толибон» вакиллари ўртасида махфий учрашув бўлиб ўтган. Бу ҳақда CNN музокаралар иштирокчиларига таяниб хабар бермоқда.
АҚШ маъмурияти Дохадаги яширин учрашувга Марказий разведка бошқармаси директори ўринбосари Дэвид Коэнни ва Давлат департаментининг Афғонистон бўйича махсус вакили Том Уэстни (у ўтган йили АҚШ Афғонистондан чиқиб кетганидан буён толиблар билан музокараларга кўпинча раҳбарлик қилиб келади) юборган. «Толибон» делегациясига эса разведка бошлиғи Абдулҳақ Восиқ раҳбарлик қилган.
Нашр қайд этишича, учрашувда Дэвид Коэн ва Восиқнинг иштироки урғу терроризмга қарши курашга берилганига ишора қилади.
МРБ ва Давлат департаменти ушбу учрашув юзасидан изоҳ беришдан бош тортган.
Миллий разведка директори собиқ ўринбосари, МРБда Афғонистон бўйича таҳлилга раҳбарлик қилган Бет Саннернинг айтишича, «Коэн, катта эҳтимол билан, АҚШ ‘Ал-Қоида’ аъзолари Афғонистонда Америка ёки унинг иттифоқдошларига хавф солувчи операцияларни қўллаб-қувватлаётганидан хабар топса, янада кўпроқ зарбалар бериши ҳақида огоҳлантирган».
Айни вақтда, шарқшунос ва Афғонистон бўйича мутахассис Андрей Серенконинг фикрича, Бет Саннер берган «эҳтимолий» ахборот шунчаки версия эмас, балки «учрашувнинг ҳақиқий кун тартибини бекитувчи версиядир».
«Бу ҳодисада энг муҳим нарса — шундай учрашувнинг бўлиб ўтгани. У толиблар ва АҚШ ҳеч ҳам душман эмас, балки мулоқотчи шериклар эканлигини яна бир марта кўрсатади. Устига-устак, махсус хизматлар раҳбарлари даражасидаги», — деб ёзди у ўз Telegram-каналида.
Изоҳ (0)