Qatar poytaxti Doxada AQSH prezidenti Jo Bayden ma’muriyatining yuqori mansabli amaldorlari va “Tolibon” vakillari o‘rtasida maxfiy uchrashuv bo‘lib o‘tgan. Bu haqda CNN muzokaralar ishtirokchilariga tayanib xabar bermoqda.
AQSH ma’muriyati Doxadagi yashirin uchrashuvga Markaziy razvedka boshqarmasi direktori o‘rinbosari Devid Koenni va Davlat departamentining Afg‘oniston bo‘yicha maxsus vakili Tom Uestni (u o‘tgan yili AQSH Afg‘onistondan chiqib ketganidan buyon toliblar bilan muzokaralarga ko‘pincha rahbarlik qilib keladi) yuborgan. “Tolibon” delegatsiyasiga esa razvedka boshlig‘i Abdulhaq Vosiq rahbarlik qilgan.
Nashr qayd etishicha, uchrashuvda Devid Koen va Vosiqning ishtiroki urg‘u terrorizmga qarshi kurashga berilganiga ishora qiladi.
MRB va Davlat departamenti ushbu uchrashuv yuzasidan izoh berishdan bosh tortgan.
Milliy razvedka direktori sobiq o‘rinbosari, MRBda Afg‘oniston bo‘yicha tahlilga rahbarlik qilgan Bet Sannerning aytishicha, “Koen, katta ehtimol bilan, AQSH ‘Al-Qoida’ a’zolari Afg‘onistonda Amerika yoki uning ittifoqdoshlariga xavf soluvchi operatsiyalarni qo‘llab-quvvatlayotganidan xabar topsa, yanada ko‘proq zarbalar berishi haqida ogohlantirgan”.
Ayni vaqtda, sharqshunos va Afg‘oniston bo‘yicha mutaxassis Andrey Serenkoning fikricha, Bet Sanner bergan “ehtimoliy” axborot shunchaki versiya emas, balki “uchrashuvning haqiqiy kun tartibini bekituvchi versiyadir”.
“Bu hodisada eng muhim narsa — shunday uchrashuvning bo‘lib o‘tgani. U toliblar va AQSH hech ham dushman emas, balki muloqotchi sheriklar ekanligini yana bir marta ko‘rsatadi. Ustiga-ustak, maxsus xizmatlar rahbarlari darajasidagi”, — deb yozdi u o‘z Telegram-kanalida.
Izoh (0)