Марказий Осиё мамлакатларидан келган муҳожирлар ихтиёрий ҳарбий хизмат ҳақида шартномалар тузишга мажбурланмоқда. Бу ҳақда ҳуқуқ ҳимоячиси Валентина Чупик Kloop нашрига маълум қилди.
«Биринчи усул — ёлғон йўли билан, — деди у. — Одамлар тиббий кўрикдан, дактилоскопиядан ўтиб, Москванинг ‘Сахарово’ миграция марказида патент расмийлаштираётганида, уларга бир даста қоғоз берилиб, ‘Мана шу ва мана шу жойларга тезгина имзо қўй’ дейишади. Бу қоғозлар орасига ихтиёрий ҳарбий хизмат ҳақидаги шартнома ҳам тиқиштириб қўйилади».
Шунингдек, Валентина Чупикнинг айтишича, ҳуқуқ ҳимоячилари яна шундай ҳолатлар ҳақида хабар топганки, муҳожирларга ҳужжатлар расмийлаштириш чоғида паспорт муқовасининг орқа қисмига V ҳарфи туширилган стикер ёпиштириб қўйишган — бу одам ихтиёрий хизмат ҳақида шартнома тузганини билдиради.
Бошқа ҳолларда, Чупикнинг сўзларига кўра, муҳожирлар депортация билан қўрқитилиб, қандайдир ҳужжатларни имзолашга мажбурланмоқда, ёки дўппосланмоқда, шунингдек, жиноий таъқиб билан таҳдид қилинмоқда.
«27 сентябрь куни қўлимга бир иш келиб тушди. Қирғиз бола, оддий курьер, велосипедда кўчада кетаётганида, полициячилар томонидан тўхтатилган. Ҳужжат сўрашган, бола кўрсатган, улар: ‘Бизнинг автобусга юр’, — деган. У автобусга яқин келган, эшик очилиб, кимдир чиққан, уни қўлтиғидан тутиб, ичкарига судраб кирган. Уни дубинкалар билан дўппослашган, тепишган, жуда қаттиқ уришган — мияси чайқалган, қовурғалари синган, кўп жойидан шикастланган. Унга шартнома имзолаб, Украинага кетиши кераклигини айтишган. У бош тортган», — деди Чупик.
Охир-оқибат, у электрошокер билан қўрқитилган ҳолда, шартномани имзолаган. Уни автобусдан тушириб юборишган. Йигитнинг танишлари Валентина Чупикни топиб, унга хабар беришган. «Биз пул тўпладик ва уни Россиядан эвакуация қилдик. 1 октябрга ўтар кечаси у Қозоғистон чегарасини кесиб ўтди», — деди ҳуқуқ ҳимоячиси.
Эслатиб ўтамиз, 20 сентябрь куни Россия Давлат думаси янги қонун қабул қилди, унга мувофиқ, армияда бор-йўғи бир йил хизмат қилганлар ушбу мамлакат фуқаролигини қўлга киритиши мумкин бўлади.
Шундан кейин Ўзбекистон Бош прокуратураси хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.
Шунингдек, Россиядаги ҳарбий хизматга чет эл фуқаролари, шу жумладан, Марказий Осиё давлатларидан келган меҳнат муҳожирлари мажбурий чақирилиши ҳақидаги миш-мишлар рад этилди. Россиянинг Ўзбекистондаги элчихонаси маълум қилишича, интернетда тарқалган бундай хабарлар ҳақиқатга тўғри келмайди.
Изоҳ (0)