Украина президенти Владимир Зеленский 10 октябрь куни эрталаб Украина шаҳарлари ракеталар билан ўққа тутилиши юзасидан мамлакат фуқароларига қаратилган видеомурожаат эълон қилди. Видеога қараганда, у Киев марказидаги Банкова кўчасида ёзиб олинган.
Оғир тонг бўлди. Террорчилар билан тўқнаш келдик. Ўнлаб ракеталар, Эроннинг «Шаҳид»лари. Уларнинг нишонлари иккита.Энергия объектлари — бутун мамлакат бўйлаб. Киевшина ва Хмельнитчина, Львов ва Днепр, Винница, Франковшина, Запорожье, Сумшина, Харьковшина, Житормиршина, Кировоградшина, Жануб. Улар саросима ва тартибсизликка интилмоқда, бизнинг энергия тизимимизни йўқ қилмоқчи. Улар умидсизликка тушган.
Иккинчи нишон — одамлар. Кўпроқ зарар етказиш учун атайлаб шу вақт ва шу нишонлар танланган.
Бугун бошпаналарда бўлиб туринг. Доим хавфсизлик қоидаларига риоя қилинг. Ҳамиша ёдда тутингки, Украина бу душман пайдо бўлмасидан олдин ҳам мавжуд бўлган, ундан кейин ҳам бўлади.
Украина президенти Владимир Зеленский
Украина шаҳарларидаги портлашлар
10 октябрь куни эрталаб Киевда ва Днепрда бир неча марта портлашлар содир бўлди. Киев мери Виталий Кличко шаҳарга зарбалар берилганини тасдиқлади. Унинг сўзларига кўра, Киев марказидаги Шевченко тумани ҳужумга учраган.Шевченко туманида ракета зарбаси оқибатида 8 киши ҳалок бўлди, яна 24 нафар тинч аҳоли вакили яраланди.
Киевда метро ҳаракати тўхтатилган, метрополитеннинг барча бекатлари фуқаролар учун бошпана сифатида фойдаланилмоқда.
Шунингдек, Днепрда ҳам портлаш овозлари эшитилган. Шаҳарда ва вилоятда ҳаво тревогаси эълон қилинган.
Бундан ташқари, ОАВлар Украинанинг Хмельницкий, Житомир, Львов, Кременчуг, Кривой Рог, Тернополь шаҳарларидаги портлашлар ҳақида ҳам хабар бермоқда.
Қрим кўпригидаги портлаш
Қрим кўпригида 8 октябрь куни тонгда юк машинаси портлаб кетди. Портлаш туфайли шу пайт кўприкнинг темир йўл қисмида ҳаракатланаётган юк поездининг ёнилғи ортилган цистерналари ёниб кетди. Оқибатда уч киши ҳалок бўлди, шунингдек, кўприкнинг автомобиль йўли қисмида учта таянч устуни оралиқлари қулаб тушди.Кўприкда ҳаракат тўхтатилди, кўрфаз орқали паромлар қатновини йўлга қўйиш режалаштирилди. 8 октябрь куни кечки пайтга келиб, кўприк орқали ҳаракат қайта тиклана бошлади. 9 октябрь куни иккита полоса орқали ҳаракат ҳам қайта йўлга қўйилди.
Россия жавоб қайтаришга ваъда берди
Қрим кўпригидаги портлашдан кейин Россия Тергов қўмитаси терроризм ҳақида иш очди, мамлакат президенти Владимир Путин воқеада Украина махсус хизматларини айблади. «Шубҳасиз, бу Россия Федерациясининг ўта муҳим фуқаролик инфратузилмасини вайрон қилишга қаратилган терактдир, — деди Путин. — Муаллифлар, ижрочилар, буюртмачилар — Украина махсус хизматлари».Қрим кўпригидаги портлаш ва ёнғин қўпорувчилик ва террорчилик ҳаракати ҳисобланади, унинг ортида эса «криминал Киев режими» турибди, уларни «йўқ қилиш» керак, деди Россия собиқ президенти, Хавфсизлик кенгаши раиси ўринбосари Дмитрий Медведев.
«Россиянинг ушбу жиноятга жавоби фақат террорчиларни бевосита йўқ қилиш бўлиши мумкин. Бутун дунёда айнан шундай қилинади. Россия фуқаролари айнан шуни кутмоқда», — дея фикр билдирди Медведев.
Украина кўприкдаги портлашни зиммасига олдими?
Портлаш Украина хавфсизлик хизмати операцияси бўлгани ҳақидаги хабарлар ҳодисадан кейин кўп ўтмай ОАВларда пайдо бўлган эди. Хусусан, бу ҳақда «Украинская Правда» ҳуқуқ-тартибот органларидаги манбасига таяниб хабар берган, The New York Times исми сир қолишни истаган украиналик юқори мартабали амалдорга асосланиб ёзган.Украина махсус хизматлари Қрим кўпригидаги портлаш учун жавобгарликни расман зиммасига олганича йўқ. Бироқ Украина Мудофаа вазирлиги Қрим кўпригидаги ҳодиса юзасидан изоҳ бериб, Twitter’да қуйидагича пост қолдирди: «‘Москва’ ракета крейсери ва Керчь кўприги — Украина Қримида Россия ҳокимиятининг иккита машҳур рамзи — йўқолди. Руслар, энди навбатда нима?»
Киев Қрим кўпригига зарба бериши ҳақида аввалроқ кўп бора огоҳлантирганди. «У орқали техника билан таъминлаш амалга оширилмоқда, демак уни бузиш керак», — деган эди Украина президенти офиси маслаҳатчиси Алексей Арестович.
Изоҳ (0)