Қайта тикланувчи энергия манбаларини сотиб олишни қўллаб-қувватловчи қарор қабул қилинди
Вазирлар Маҳкамасининг 5 октябрда қабул қилинган қарори билан қайта тикланувчи энергия манбаларини сотиб олиш билан боғлиқ харажатларнинг бир қисмини қоплаб бериш тартиби тасдиқланди. Бу ҳақда Энергетика вазирлиги хабар бермоқда.
Фуқаролар (жисмоний шахслар) 2022 йил 1 октябрдан бошлаб мамлакатда ишлаб чиқарилган қуёш ва шамол электр станциялари ҳамда қуёш сув иситиш қурилмаларини уч йил муддатга фоизсиз бўлиб-бўлиб тўлаш шарти билан сотиб олишлари мумкин. Бундан ташқари, қайта тикланувчи энергия манбалари қурилмаларининг тўлиқ нархини тўлаган ҳолда сотиб олганда истеъмолчилар компенсация олишлари мумкин.
Энергетика вазирлиги ҳузуридаги Бюджетдан ташқари тармоқлараро энергия тежаш жамғармасига қайта тикланувчи энергия манбалари қурилмаларини сотиб олишда имтиёз ва преференциялар бериш юкланган.
Вазирлар Маҳкамасининг қарорига мувофиқ қуёш ёки шамол электр станциясини ўрнатиш учун жисмоний шахсларга қувватига қараб компенсация миқдори қуйидагича берилади:
- 0,5 кВт дан 1 кВт гача — БҲМнинг 7 баробари;
- 1 кВт дан 1,5 кВт гача — БҲМнинг 10 баробари;
- 1,5 кВт дан 2 кВтгача — БҲМнинг 15 баробари;
- 2 кВт ва ундан юқори — БҲМнинг 20 баробари;
- 5 кВт ва ундан юқори қайта тикланувчи энергия манбаларидан электр энергияси билан таъминланган вертикал қудуқларга янги ерларни ўзлаштириш ва сув насосларини ўрнатишда БҲМнинг 50 баравари миқдорида компенсация берилади.
Платформада қайта тикланувчи энергия манбаларини ишлаб чиқарувчи ва хизматлар кўрсатувчи корхоналарнинг маҳсулот ва хизматларини сотиш бўйича таклифлари жойлаштирилди. Шу билан бирга, платформага киритилган корхоналар рўйхати «Ўзелтехсаноат» уюшмаси томонидан тақдим этилади.
Жисмоний шахсларнинг компенсация ёки бўлиб-бўлиб тўлаш бўйича аризалари платформа орқали онлайн тарзда топширилади.
