Ўзбекистонда сон суяги синиши бўйича янги жарроҳлик амалиёти йўлга қўйилди

Ўзбекистонда илк бор сон суяклари синишлари ўткир даврида тос-сон бўғинини эндопротезлаш йўлга қўйилди. Бу ҳақда Соғлиқни сақлаш вазирлиги матбуот хизмати хабар берди.

Шошилинч тиббий хизмат одамлар энг кўп мурожаат қиладиган, аҳолига ҳар томонлама тез ва сифатли ёрдам кўрсатувчи муҳим тузилма саналади. Охирги йилларда мазкур йўналишда яхлит тизим яратилиб, унинг қамрови янада кенгайди. Хусусан, Республика шошилинч тиббий ёрдам илмий маркази ва унинг Қорақалпоғистон ҳамда вилоятлардаги 13 филиали ҳамда 181 та субфилиалида аҳолига давлат томонидан кафолатланган бепул, сифатли ва шошилинч тиббий ёрдам кўрсатиб келинмоқда.

Биргина РШТЁИМнинг 53 та клиник ва параклиник бўлим ҳамда таркибий бўлинмаларида бугунги кунда ўнлаб турли юқори технологик ва мураккаб жарроҳлик амалиётлари муваффақиятли бажариляпти.

Жумладан, катталар ва болаларда қорин бўшлиғи, кўкрак қафасидаги барча шошилинч касалликларда минимал инвазив лапароскопик жарроҳлик усуллари, юрак ҳуружи ва бош мия қон айланиши бузилишларида дунёда «олтин стандарт» сифатида қабул қилинган тери орқали минимал инвазив ангиографик усуллар кенг қўлланилмоқда.

Ҳозир диагностика ва даволаш жараёнига бир қатор инновацион усуллар татбиқ қилиняпти. Хусусан, 2022 йил марказ ва унинг ҳудудий филиалларида ‘бола ёшидаги шикастланишлар’ бўлими ташкил қилинди. Умуртқаларнинг ностабил синишларини хирургик даволашнинг замонавий усуллари амалиётга татбиқ қилиниши натижасида эса 900 нафардан зиёд беморнинг соғайиш муддати қисқарди, — дейди РШТЁИМ директори Дониёр Алимов.

Қолаверса, япониялик мутахассислар билан ҳамкорликда бош миянинг қон томир нуқсонларини диагностика қилиш ва хирургик даволашнинг энг замонавий усулларини қўллаш орқали инсульт оқибатида чуқур ногиронликка маҳкум бўлган 35 нафардан зиёд беморда ноёб операциялар ўтказилди.