4 октябрь куни Россия Федерация Кенгаши Украина ҳудудларини аннексия қилишни бир овоздан маъқуллади. Шу билан бирга, Украина президенти Владимир Зеленский Россия қўшинлари томонидан босиб олинган Херсон вилоятидаги яна саккизта аҳоли пункти озод этилганини маълум қилди. Шунингдек, у Россия билан музокаралар олиб боришни тақиқлаш ҳақидаги фармонни имзолади. Қўшма Штатлар Украинага яна 625 миллион долларлик ёрдам пакети ажратди, жумладан, бу янги HIMARS қурилмаларини етказиб беришни ўз ичига олади. Александр Лукашенко Беларусь Украинадаги урушда иштирок этаётганини тасдиқлади. Meduza урушнинг 223-кунига оид асосий фотосуратларни жамлади.
Россияда тўрт ой асирликда сақланган «азовчи»ларнинг фотосуратлари
«Уйдаги биринчи кунимда сартарошхонага бордим, сочимни олдирдим. Жабрланувчи бўлиб кўринишни ҳеч қачон хоҳламаганман», — дейди Украинага қайтарилган Дмитрий Козацкий фотографлар Константин ва Влад Либеровларга. Козацкий — «Азов» жангчиси, у Мариупол ҳимоячиларини суратга оларди. 20 май куни у «Азовсталь»да қолган ҳарбийлар билан бирга асирга тушди.
Уч ой ўтгач, Россия ва Украина асирларни алмашди: 215 нафар украиналик аскар, шу жумладан завод ҳимоячилари ва «Азов» полки қўмондонлиги Украина асирлигидаги Виктор Медведчук ва 55 нафар рус аскари билан алмаштирилди. Уйга қайтган «азовчи»ларнинг аксарияти асирликда озиб-тўзиб кетганди.
Украина Қуролли кучлари томонидан озод қилинган Лиман шаҳри ва унинг атрофидаги қишлоқлар
1 октябрь куни Украина ҳарбийлари Донецк вилоятидаги 20 мингга яқин аҳоли истиқомат қилувчи кичик шаҳар Лиманга кирди, рус қўшинлари уни 2022 йилнинг ёзи бошида қўлга киритган эди. Лимандан чекиниш чоғида Россия Қуролли Кучлари Бош штаби Бош бошқармасининг 3-гвардия махсус кучлари бригадасидан камида тўққиз нафар россиялик ҳарбий хизматчиси ҳалок бўлди, деб хабар беради BBC рус хизмати. Бўлимнинг яна бир аскари оғир яраланган. Аммо Россия «ҳарбий мухбирлари» даъво қилишича, шаҳар мудофаасида қўшинларнинг элита қисми эмас, балки «кўнгиллилар», казаклар, шунингдек, ЛХРнинг сафарбар қилинган аҳолиси қатнашган.
Харьков ва Краматорскнинг ўққа тутилиши
4 октябрга ўтар кечаси Россия ҳарбийлари томонидан Харьковнинг икки тумани ўққа тутилиши оқибатида бир аёл ҳалок бўлди ва «муҳим инфратузилма»га зарар етди, деб хабар қилди Харьков вилояти ҳарбий бошқармаси бошлиғи Олег Синегубов. Ўша кеча Россия ҳарбийлари Донецк вилоятининг Краматорск шаҳрини ҳам ўққа тутди. Краматорск шаҳар кенгаши маълумотларига кўра, икки аҳоли жароҳатланган.
Шарқий Украинада кечган жанг оқибатлари
Харьков вилоятида Украина қуролли кучлари қарши ҳужумни давом эттирмоқда. Владимир Зеленский шу ҳафта Херсон вилоятидаги аҳоли пунктларидан ташқари Харьков, Луганск ва Донецк вилоятларидаги шаҳар ва қишлоқлар «Россия псевдореферендумидан озод қилинганини» айтди. Унинг сўзларига кўра, гап ўнлаб озод қилинган аҳоли пунктлари ҳақида кетмоқда.
Изоҳ (0)