Бельгияда коронавируснинг янги тўлқини кузатилмоқда

Бельгияда Sciensano жамият саломатлиги институти коронавирус пандемиясининг янги тўлқини вужудга келганини тасдиқлади, деб ёзади «Интерфакс».

Вирусолог Стефан ван Гухт ҳисоб-китобларига кўра, касалланиш тўлқини ўтган ҳафтада бошланган, ўшанда кунлик касалланиш ҳолатлари 26 фоизга, касалхонага ётқизиш ҳолатлари эса 28 фоизга кўпайган.

Sciensano янги тўлқин кузатилишини икки ҳафта аввалроқ башорат қилганди, у октябрь ўрталарида авжига чиқиши кутилмоқда.

Беморларнинг 92,3 фоизида Омиcрон БА.5 штамми қайд этилмоқда.

Францияда мутахассислар коронавирус билан касалланиш кўпайиши туфайли, ниқоб режимини қайтаришни муҳокама қилмоқда. Бу ҳақда Санитар хавфлар устидан назорат қўмитаси раиси, иммунолог Брижит Отран маълум қилди.

«Барча кўрсаткичлар ўсмоқда: мусбат тестлар, касалхонага ётқизишлар сони, шифохоналар қабулхоналарига ташрифлар, ҳатто реанимация бўлинмаларида беморлар сони ошмоқда. Яъни, ҳа, бу — саккизинчи тўлқин, — деди у. — Ҳақиқатан ҳам, ниқоб тақиш керак».

Бундан қарийб бир ой аввал халқаро экспертлар, олимлар, жумладан, Жаҳон соғлиқни сақлаш ташкилоти раҳбари Тедрос Гебрейесус куз мавсуми бошланиши билан дунёда коронавирус инфекцияси кескин авж олишидан жиддий ташвишда эди. Аммо ўтган ҳафтада коронавирусдан ўлим кўрсаткичи 18 фоизга камайди.

Аввалроқ АҚШ президенти Жо Байден COVID-19 пандемияси тугаганини айтган, аммо мамлакатда вирус билан боғлиқ «муаммо» ҳамон сақланиб қолаётганини тан олганди.

Шунингдек, Жаҳон соғлиқни сақлаш ташкилоти бош директори Тедрос Адханом Гебрейесус COVID-19 пандемиясининг ниҳояси яқинлигини айтганди.