Эрталаб оч қоринга кефирли гречка истеъмол қилиш нимаси билан фойдали?

Гречкани кефир билан истеъмол қилиш — бу организмни токсинлардан тозалаш, овқат ҳазм қилиш, метаболизмни яхшилаш ва вазнни камайтиришнинг энг оддий, аммо жуда самарали усули, деб ёзади Wday.

Нима учун эрталаб оч қоринга келфирли гречка истеъмол қилиш фойдали ҳисобланади?

Гречка ўсимлик оқсили ва соғлом углеводлар манбаи бўлиб, у узоқ вақт давомида тўқлик ҳисси ва энергия беради. Бундан ташқари, гречкада инсон саломатлиги учун зарур бўлган кўплаб микроэлемент ва витаминлар мавжуд:

• калий;
• темир;
• фосфор;
• ёд;
• фолий кислотаси;
• ниоцин;
• B гуруҳи витаминлари;
• PP витамини.

Шунингдек, гречка антиоксидантларнинг энг йирик манбаи ҳисобланади — ҳужайра қаришини секинлаштириш қобилияти илмий жиҳатдан тасдиқланган. Клетчаткага бой бўлган хом донлар овқат ҳазм қилишни яхшилашга ва қонда шакар даражасини пасайтиришга ёрдам беради. Шифокорлар гипертония, атеросклероз, тромбоз, ревматизм, қандли диабет каби касалликларнинг олдини олиш учун кундалик рационга гречкани киритишни тавсия этади.

Кефирда эса овқат ҳазм қилиш трактининг фаолиятини яхшилайдиган муҳим аминокислота ва бифидобактериялар ҳам мавжуд. Иккала маҳсулот ҳам бир-бирини мукаммал равишда тўлдиради, организмни барча керакли озиқ моддалар билан таъминлайди, лекин ортиқча ёғ ва углеводлар билан қийнамайди.

Эрталаб оч қоринга кефирли гречка истеъмол қилиш организмни тозалашга, тўпланган токсинларни чиқариб ташлашга, қондаги қанд миқдорини нормаллаштиришга ёрдам беради.

Гречка қўшилган сутли шўрва рецепти

Керакли маҳсулотлар:

• сут — 1 литр;
• гречка — 0,5 стакан;
• шакар — 1,5 ош қошиқ;
• туз — бир чимдим;
• сариёғ — 25 грамм.

Сут қайнатиб олинади. Олдиндан ювилган гречка сутга қўшилади, олов пасайтирилиб, вақти-вақти билан аралаштирилади ва 15 дақиқа давомида пиширилади. Туз ва шакар қўшилгандан сўнг яна 5 дақиқа пиширилади. Сариёғ қўшиб, истеъмол қилиш мумкин.

Гречка ва гуручли бўтқа рецепти

Керакли маҳсулотлар:

• гречка — 100 грамм;
• гуруч — 100 грамм;
• ўсимлик ёғи — 1 ош қошиқ;
• сув — 2,5 стакан;
• туз.

Гуруч ва гречка аралаштирилади ва сув тиниқ бўлгунча ювилади. Идишда сув қайнатиб олинади, гречка-гуруч аралашмаси қўшилади. Сув қайнаши биланоқ туз ва ўсимлик мойи қўшилади. Олов пасайтирилади ва сув деярли буғланиб кетгунча 15 дақиқа қайнатиб олинади. Тайёр бўлгач, бўтқа оловдан олиниб, қопқоғи ёпилади ва 10 дақиқа давомида сочиқ билан ўралади. Бу вақт ичида дон қолган намликни шимиб олади. Бўтқага сариёғ қўшиб, истеъмол қилиш мумкин.

Кефирли гречкани қандай пишириш ва истеъмол қилиш керак?

Гречка таркибидаги озуқа моддалари ва клетчатканинг максимал миқдорини сақлаб қолиш учун уни пишириш шарт эмас. Кефирга қўшилган хом гречка жуда ёқимли таъм ва тузилишга эга бўлади.

• Бунинг учун 2 ош қошиқ гречка совуқ сувда ювилиб, сўнгра устидан қайноқ сув қуйилади.
• Сув шимиб олингач, гречка идишга солинади ва 200 мл кефир қуйилади. Музлаткичда бир кеча қолдирилади.
• Уни эрталаб, оч қоринга, нонушта ўрнига истеъмол қилиш мумкин.
• Туз, шакар, сариёғ ва бошқа маҳсулотлар қўшилмайди.

Агар мақсад вазн йўқотиш бўлса, кефирли гречкани эрталабки нонуштага бир ҳафтадан икки ҳафтагача истеъмол қилиш керак. Кундалик калория истеъмолини кузатиб бориш лозим: агар бошқа овқатлар калорияларда жуда юқори бўлмаса, тез орада ижобий натижаларни сезиш мумкин. Организмни тозалаш, витамин ва клетчаткага бўлган эҳтиёжни тўлдириш учун нонуштага ҳафтада бир ёки икки марта кефирли гречка истеъмол қилиш тавсия этилади.