«Дарё»га Бухородаги мактаб директори ходимларидан мажбурий пул ундираётгани айтилган мурожаат келиб тушди. Унда айтилишича, 2022 йилнинг 15 сентябрида фойдаланишга топширилган Бухоро туманидаги 20-умумий ўрта таълим мактабининг 240 ўринли янги биносида қоровулхона қуриш учун ўқитувчилардан 3,5 миллион сўм, шунингдек, директор талаби билан жами 31 миллион сўм пул йиғиб олингани маълум қилинган. «Дарё» мухбири ҳолатга ойдинлик киритиш мақсадида ушбу мактабда бўлди.
Аниқланишича, мактабнинг янги ўқув биносини ҳамда унинг синфхоналарини безатиш, деразаларга пардалар ўрнатиш, қўшимча интернет тизимини улаш ва шу каби ишлар учун ўқитувчилар ойлик маошидан умумий ҳисобда 31 миллион сўм маблағ йиғиб олинган. Бу иш математика фани ўқитувчиси Лутфия Қурбонова зиммасига юклатилиб, рўйхат шакллантирилган. Рўйхатда ўқитувчиларнинг ойлик маошига қараб, уларнинг ҳар биридан қанча миқдорда пул йиғилиши белгилаб қўйилган.
Ҳисоб-китоб рўйхатини ўзим шакллантирдим. 11 миллион 200 минг сўмни ўзим йиғганман. Лекин ҳали ҳамма ҳам бергани йўқ. Орамизда кредит тўловчилар ва шароити етарли бўлмаганлар бор. Улар пулни икки-учга бўлиб беришларини билдиришган. Биз «хўп» дедик. Бу пулларнинг ҳаммаси мактаб учун сарфланди. Тўғриси, жудаям асабий ҳолатдамиз. Йил бошида «Болалардан пул йиғмаймиз» деб кафолат хати ёзиб берганмиз-да, ўқитувчилардан эмас, болалардан олишимиз керак экан, шунча бошоғриқ бўлмасдик. Синф хонасига ўтирасанми, «бер» дейиш керак эди-да, — дейди ўқитувчи Лутфия Қурбонова.
Маълум қилинишича, ўқитувчилардан пул йиғиб олиш ишига мактабнинг ота-оналар билан ишлаш қўмитаси раиси Нигина Қўзиева ҳам аралашган. У бу пулларнинг сарф-харажати юзасидан баённома ва далолатномалар тузилганини билдирган.
Йиғилган пулларнинг бир тийинига ҳам хиёнат қилинмаган. Бу ишларнинг бари ўқитувчиларнинг ўз ташаббуси ва таклифларидан келиб чиқиб, амалга оширилди. Мактабимиз туманнинг узоқ қишлоқларидан бирида жойлашгани учун ҳам замондан ортда қолмасин, ўқувчилар — болаларимиз яхши мактабларда ўқишсин, деган ният билан қилгандик, — дейди Нигина Қўзиева.
Бундан ташқари, ўқитувчилар ўз маошидан ўн миллион сўмни Click хизмати орқали мактаб директорининг ўқув ишлари бўйича ўринбосари Мўътабар Муҳаммедованинг шахсий пластик картасига ўтказиб берган.
Кредитдан қарздорлигим ва тўлов-шартномаларни қоплаш учун ҳеч қандай харажатим йўқлиги боис, шунча миқдордаги пуллар менинг пластик картамга ташланди. Ўн миллион сўм пулни тийинма-тийин нақдлаштириб, Лутфия Қурбоновага бердим, уларни ўзимнинг моддий манфаатим йўлида ишлатганим йўқ, — дейди Мўътабар Муҳаммедова.
«Дарё» мухбири билан суҳбатда бўлган мактаб директори Шаҳло Файзуллоева ўқитувчилар ташаббуси билан катта миқдордаги пул йиғилаётгани ҳақида олдиндан хабардор бўлганини, бироқ уларга ҳеч қандай эътироз қилмаганини айтмоқда.
Ташаббусларига қарши чиқмадим. Аммо, ортиқча гап-сўз чиқмасин, деб пулларни ўз пластик картамга эмас, ўқув ишлари бўйича ўринбосаримнинг пластик картасига ўтказилишини тушунтирдим. Ҳомийлар кўмагида йиғилган шунча миқдордаги пулларни мактаб жамғармаси ҳисоб-рақамига кўчириб, мактабни безаш учун керакли анжомларни биржа орқали ҳам олса бўлар эди. Бироқ, фурсат жуда қисқа, янги мактаб биносининг очилишига саноқли кунлар қолганини ўйлаб, шу йўлни тутган эдик, — дейди мактаб директори.
Инглиз тили фани ўқитувчиси Дурдона Қаюмова ойлик маошидан 1 миллион сўм пулни ўз ихтиёри билан берганини айтмоқда.
Мен шахсан ойлик маошимнинг 22 фоизи, яъни бир миллион сўмни ўз ихтиёрим билан беришга рози бўлдим. Агар мен синфхонамнинг барча муаммоларини ўзим бартараф қиладиган бўлсам, бу сумма умуман етмайди. Ўз хонамизни безатганмиз, ҳеч ким мажбурламаган, — дейди у.
Шахсини очиқлашдан қўрққан мактаб ўқитувчиларидан бири эса «Дарё» мухбири билан суҳбатда катта миқдордаги пуллар йиғилишида ихтиёрийлик ортида мажбурийлик турганини билдирган.
Тўғри, мактабимиз директори ташаббускор, ҳаракатчан. У бу йиғилган пулларни ўз манфаати йўлида ишлатмаган, мактаб ривожи учун сарфлаган. Лекин турли мақсадлар билан кредит қарздорликларини тўлаб юрган ўқитувчилар бор, шароити етарли бўлмаганлар ҳам йўқ эмас. Мактабни безаш ва жиҳозлаш билан боғлиқ харажатларни қоплаш учун ҳисобланган жами 31 миллион миқдоридаги пулларни ҳаммадан бир хил, яъни ойлик маошининг айнан белгиланган 22 фоизидан йиғиш — аслида мажбурийлик эмасми? — дейди у.
Менинг ҳеч кимга хусуматим йўқ. Катта миқдордаги бу пулларни мактаб ишларига сарфлашган бўлишса ҳам, уни ноқонунийлик ва ихтиёрий-мажбурийлик асосида йиғишди. Муаммони ҳал қилиш ўрнига ким ёзгани билан қизиқишаётгани ажабланарли, — деди суҳбатдош.
Мактаб директори Шаҳло Файзуллоева пул йиғилиши ортидан ҳеч қандай манфаатдорлик йўқлигини айтиб, «Бу ерда кўролмаслик, душманчилик бор. Ҳаммамиз ҳам мактаб ривожи учун ҳаракат қилгандик», — дейди у.
«Дарё» мухбири билан суҳбатлашган туман прокуратураси ходими пуллар мактаб манфаати учун сарфланишига ишонишини, аммо бу ҳаракат ноқонуний эканини билдирган.
Масъуллар қонунчиликда тақиқланган ҳаракатни юзага келтиришган. Вазиятни ўрганамиз. Қонуний қарор қабул қилинади. Ҳолат туман прокуратураси томонидан назоратга олинди. Терговга қадар текширув ҳамда аризани ўрганиш ишлари бошланди. Қонуний ўрганишлар якунлангач, батафсил маълумот берилади, — дейди туман прокуратураси ходими.«Дарё» воқеалар ривожини кузатишда давом этади.
Изоҳ (0)