“Daryo”ga Buxorodagi maktab direktori xodimlaridan majburiy pul undirayotgani aytilgan murojaat kelib tushdi. Unda aytilishicha, 2022-yilning 15-sentabrida foydalanishga topshirilgan Buxoro tumanidagi 20-umumiy o‘rta ta’lim maktabining 240 o‘rinli yangi binosida qorovulxona qurish uchun o‘qituvchilardan 3,5 million so‘m, shuningdek, direktor talabi bilan jami 31 million so‘m pul yig‘ib olingani ma’lum qilingan. “Daryo” muxbiri holatga oydinlik kiritish maqsadida ushbu maktabda bo‘ldi.
Aniqlanishicha, maktabning yangi o‘quv binosini hamda uning sinfxonalarini bezatish, derazalarga pardalar o‘rnatish, qo‘shimcha internet tizimini ulash va shu kabi ishlar uchun o‘qituvchilar oylik maoshidan umumiy hisobda 31 million so‘m mablag‘ yig‘ib olingan. Bu ish matematika fani o‘qituvchisi Lutfiya Qurbonova zimmasiga yuklatilib, ro‘yxat shakllantirilgan. Ro‘yxatda o‘qituvchilarning oylik maoshiga qarab, ularning har biridan qancha miqdorda pul yig‘ilishi belgilab qo‘yilgan.
Hisob-kitob ro‘yxatini o‘zim shakllantirdim. 11 million 200 ming so‘mni o‘zim yig‘ganman. Lekin hali hamma ham bergani yo‘q. Oramizda kredit to‘lovchilar va sharoiti yetarli bo‘lmaganlar bor. Ular pulni ikki-uchga bo‘lib berishlarini bildirishgan. Biz “xo‘p” dedik. Bu pullarning hammasi maktab uchun sarflandi. To‘g‘risi, judayam asabiy holatdamiz. Yil boshida “Bolalardan pul yig‘maymiz” deb kafolat xati yozib berganmiz-da, o‘qituvchilardan emas, bolalardan olishimiz kerak ekan, shuncha boshog‘riq bo‘lmasdik. Sinf xonasiga o‘tirasanmi, “ber” deyish kerak edi-da, — deydi o‘qituvchi Lutfiya Qurbonova.
Ma’lum qilinishicha, o‘qituvchilardan pul yig‘ib olish ishiga maktabning ota-onalar bilan ishlash qo‘mitasi raisi Nigina Qo‘ziyeva ham aralashgan. U bu pullarning sarf-xarajati yuzasidan bayonnoma va dalolatnomalar tuzilganini bildirgan.
Yig‘ilgan pullarning bir tiyiniga ham xiyonat qilinmagan. Bu ishlarning bari o‘qituvchilarning o‘z tashabbusi va takliflaridan kelib chiqib, amalga oshirildi. Maktabimiz tumanning uzoq qishloqlaridan birida joylashgani uchun ham zamondan ortda qolmasin, o‘quvchilar — bolalarimiz yaxshi maktablarda o‘qishsin, degan niyat bilan qilgandik, — deydi Nigina Qo‘ziyeva.
Bundan tashqari, o‘qituvchilar o‘z maoshidan o‘n million so‘mni Click xizmati orqali maktab direktorining o‘quv ishlari bo‘yicha o‘rinbosari Mo‘tabar Muhammedovaning shaxsiy plastik kartasiga o‘tkazib bergan.
Kreditdan qarzdorligim va to‘lov-shartnomalarni qoplash uchun hech qanday xarajatim yo‘qligi bois, shuncha miqdordagi pullar mening plastik kartamga tashlandi. O‘n million so‘m pulni tiyinma-tiyin naqdlashtirib, Lutfiya Qurbonovaga berdim, ularni o‘zimning moddiy manfaatim yo‘lida ishlatganim yo‘q, — deydi Mo‘tabar Muhammedova.
“Daryo” muxbiri bilan suhbatda bo‘lgan maktab direktori Shahlo Fayzulloyeva o‘qituvchilar tashabbusi bilan katta miqdordagi pul yig‘ilayotgani haqida oldindan xabardor bo‘lganini, biroq ularga hech qanday e’tiroz qilmaganini aytmoqda.
Tashabbuslariga qarshi chiqmadim. Ammo, ortiqcha gap-so‘z chiqmasin, deb pullarni o‘z plastik kartamga emas, o‘quv ishlari bo‘yicha o‘rinbosarimning plastik kartasiga o‘tkazilishini tushuntirdim. Homiylar ko‘magida yig‘ilgan shuncha miqdordagi pullarni maktab jamg‘armasi hisob-raqamiga ko‘chirib, maktabni bezash uchun kerakli anjomlarni birja orqali ham olsa bo‘lar edi. Biroq, fursat juda qisqa, yangi maktab binosining ochilishiga sanoqli kunlar qolganini o‘ylab, shu yo‘lni tutgan edik, — deydi maktab direktori.
Ingliz tili fani o‘qituvchisi Durdona Qayumova oylik maoshidan 1 million so‘m pulni o‘z ixtiyori bilan berganini aytmoqda.
Men shaxsan oylik maoshimning 22 foizi, ya’ni bir million so‘mni o‘z ixtiyorim bilan berishga rozi bo‘ldim. Agar men sinfxonamning barcha muammolarini o‘zim bartaraf qiladigan bo‘lsam, bu summa umuman yetmaydi. O‘z xonamizni bezatganmiz, hech kim majburlamagan, — deydi u.
Shaxsini ochiqlashdan qo‘rqqan maktab o‘qituvchilaridan biri esa “Daryo” muxbiri bilan suhbatda katta miqdordagi pullar yig‘ilishida ixtiyoriylik ortida majburiylik turganini bildirgan.
To‘g‘ri, maktabimiz direktori tashabbuskor, harakatchan. U bu yig‘ilgan pullarni o‘z manfaati yo‘lida ishlatmagan, maktab rivoji uchun sarflagan. Lekin turli maqsadlar bilan kredit qarzdorliklarini to‘lab yurgan o‘qituvchilar bor, sharoiti yetarli bo‘lmaganlar ham yo‘q emas. Maktabni bezash va jihozlash bilan bog‘liq xarajatlarni qoplash uchun hisoblangan jami 31 million miqdoridagi pullarni hammadan bir xil, ya’ni oylik maoshining aynan belgilangan 22 foizidan yig‘ish — aslida majburiylik emasmi? — deydi u.
Mening hech kimga xusumatim yo‘q. Katta miqdordagi bu pullarni maktab ishlariga sarflashgan bo‘lishsa ham, uni noqonuniylik va ixtiyoriy-majburiylik asosida yig‘ishdi. Muammoni hal qilish o‘rniga kim yozgani bilan qiziqishayotgani ajablanarli, — dedi suhbatdosh.
Maktab direktori Shahlo Fayzulloyeva pul yig‘ilishi ortidan hech qanday manfaatdorlik yo‘qligini aytib, “Bu yerda ko‘rolmaslik, dushmanchilik bor. Hammamiz ham maktab rivoji uchun harakat qilgandik”, — deydi u.
“Daryo” muxbiri bilan suhbatlashgan tuman prokuraturasi xodimi pullar maktab manfaati uchun sarflanishiga ishonishini, ammo bu harakat noqonuniy ekanini bildirgan.
Mas’ullar qonunchilikda taqiqlangan harakatni yuzaga keltirishgan. Vaziyatni o‘rganamiz. Qonuniy qaror qabul qilinadi. Holat tuman prokuraturasi tomonidan nazoratga olindi. Tergovga qadar tekshiruv hamda arizani o‘rganish ishlari boshlandi. Qonuniy o‘rganishlar yakunlangach, batafsil ma’lumot beriladi, — deydi tuman prokuraturasi xodimi.“Daryo” voqealar rivojini kuzatishda davom etadi.
Izoh (0)