Bayden “Ien” bo‘roni tufayli Florida shtatida favqulodda holat e’lon qildi
AQSH prezidenti Jo Bayden Florida shtatiga “Ien” tropik bo‘roni yaqinlashib kelayotgani munosabati bilan favqulodda holat e’lon qilish haqidagi farmonni imzoladi va mahalliy hokimiyatlarga federal yordam ko‘rsatishni buyurdi. Bu haqda Oq uy matbuot xizmati xabar berdi.
“Bugun prezident Jo Bayden Florida shtatida favqulodda holat e’lon qildi va ‘Ien’ tropik bo‘roni tufayli yuzaga keladigan favqulodda vaziyatlarga javoban mahalliy hokimiyatlarning sa’y-harakatlarini to‘ldirish uchun federal yordam ko‘rsatishni buyurdi”, — deyiladi xabarda.
Baydenning buyrug‘i Florida hukumatiga AQSH Ichki xavfsizlik departamenti va Favqulodda vaziyatlarni boshqarish bo‘yicha federal agentlikdan yordam ko‘rsatishni nazarda tutadi.
Florida — AQSHning janubi-sharqidagi shtat, poytaxti Tallaxassi shahri. Floridadagi o‘rtacha yog‘ingarchilik boshqa shtatlardagi ko‘rsatkichdan yuqori bo‘ladi. Odatda, Floridada yomg‘irlar mavsum iyul oyining oxiridan noyabr oyining boshigacha davom etadi, bo‘ronlar esa ko‘pincha sentabrda keladi.
“Ien” tropik bo‘roni sal avvalroq Atlantika okeanida Yamayka orol-davlatidan 625 kilometr janubi-sharqda paydo bo‘lgan va shimoli-g‘arbga taxminan 18 km/soat tezlikda harakatlanayotgan edi. Bo‘ron ichida shamol tezligi 18 m/s ga yetadi.
AQSHning Dovullarni kuzatish milliy markazi prognozlariga ko‘ra, bo‘ron sabab 26-sentabrga o‘tar kechasi Kayman orollari qirg‘oqlarida suv sathi ko‘tarilishi mumkin. Yamaykada qirg‘oqlarni suv bosishi mumkin.
