Никарагуа Ташқи ишлар вазирлиги Нидерландия билан дипломатик муносабатларни узганини эълон қилди. Шу ҳафта бошида Никарагуа ҳукумати Европа Иттифоқи элчисини persona non grata деб эълон қилган, шунингдек, АҚШнинг янги элчисини қабул қилишдан бош тортган эди.
Нидерландия билан муносабатларнинг узилишига уларнинг Никарагуада шифохона қурилишини молиялаштиришдан бош тортиши сабаб бўлди. Лойиҳа бир неча йил олдин тасдиқланган эди. Нидерландиянинг қарорини мамлакат элчиси Кристин Пиренн Манагуага ташрифи чоғида маълум қилган. Никарагуа президенти Даниэль Ортеганинг айтишича, «элчи никарагуаликлар билан суҳбатлашишга келганда гўёки Никарагуага голланд мустамлакасидек қараган».
Бундан ташқари Никарагуа Ташқи ишлар вазирлиги Нидерландия давлат ишларига аралашганини даъво қилмоқда.
Март ойида Никарагуа Ватикан элчисини чиқариб юборган эди. Сентябрь ойида Ортега Рим-католик черковини нодемократликда, диктатура ва зулмга содиқликда, шунингдек, 2018 йилда Никарагуада қонуний ҳукуматни ағдаришга уринишда айблаб, уни қаттиқ танқид қилди.
Изоҳ (0)