Польша ҳаво ҳудудини тартибга солиш бўйича НАТО миссиясида қатнашаётган Италия Ҳарбий-ҳаво кучлари Польша чегарасига яқинлашган Россия самолёти туфайли ҳавога кўтарилди, деб хабар бермоқда «РБК».
Россия ҳаво кемасига Eurofighter қирувчи самолёти «пешвоз чиқди».
Бу Польшада Италия авиацияси зудлик билан ҳавога кўтарилиши билан боғлиқ биринчи ҳолат эмас — 27 сентябрь куни Италия Ҳарбий-ҳаво кучлари НАТОнинг шимоли-шарқий чегарасида Россиянинг учта самолёти тўхтатиб қолинганини маълум қилганди.
Россиянинг Украинадаги ҳарбий операцияси туфайли, НАТО мамлакатлари июнь охирида Россияни «НАТО аъзоларига ҳамда Евро-Атлантика минтақасида тинчлик ва барқарорликка нисбатан энг жиддий ва тўғридан-тўғри таҳдид» деб тан олди.
Шу муносабат билан альянс ўзининг шарқий чегараларида ҳарбий контингентни оширишга қарор қилди. НАТО бош котиби Йенс Столтенберг альянс Россияга қарши туришга 2014 йилдан буён тайёрланиб келганини, Россиядаги ҳарбий операция у учун кутилмаган янгилик бўлмаганини айтди.
Польша ўз навбатида НАТОнинг Европа мамлакатлари ичида энг кучли қуруқлик қўшинларини тузишга қарор қилди. Варшава Жанубий Корея ва АҚШ каби мамлакатлардан техника сотиб олди.
Аввалроқ Италия Россияда қолишга зарурати бўлмаган фуқароларига зудлик билан у ерни тарк этишни тавсия қилган эди.
Изоҳ (0)