Украина президенти Владимир Зеленский, агар Россия ДХР, ЛХР ҳамда Херсон ва Запорожье вилоятларининг ўз назорати остидаги ҳудудларида ўтказилган референдумлар натижаларини тан олса, президент Владимир Путин билан «гаплашадиган гапи бўлмаслиги»ни маълум қилди. Бу ҳақда у БМТ Хавфсизлик кенгаши мажлисида видеоалоқа орқали сўзлаган нутқида айтиб ўтди.
«Россия томонидан ушбу сохта референдумларнинг нормал деб қабул қилиниши, ҳозир Қрим сценарийсининг амалга оширилиши, Украина ҳудудини ўзига қўшиб олиш бўйича навбатдаги уриниш шуни англатадики, бизнинг Россия президенти билан гаплашадиган гапимиз йўқ. Аннексия (босиб олиш) — уни бутун инсониятга қарама-қарши қилиб қўядиган қадамдир», — деди Зеленский.
Август ойида Зеленский, агар референдумлар амалга ошса, Украина Россия билан музокараларда қатнашмаслиги ҳақида огоҳлантирганди. Икки мамлакат делегациялари ўртасидаги тинчлик музокаралари жараёни баҳордан буён тўхтатиб қўйилган.
Россия таркибига кириш ҳақидаги референдумларда овоз бериш 27 сентябрь куни якунланди. Кечки вақтга келиб, тўртта ҳудудда ҳам бюллетенларнинг 100 фоизи кўриб чиқилди. Натижаларга кўра, ЛХР, ДХР ва Запорожье вилоятида овоз берганларнинг 90 фоизи, Херсон вилоятида эса 87 фоизи Россияга қўшилишни қўллаб-қувватлади.
Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
Россия Федерация кенгаши раиси Валентина Матвиенко юқори палата томонидан янги ҳудудларнинг Россия таркибига кириши ҳақидаги қонунлар кўриб чиқиладиган мажлис 4 октябрда ўтказилиши мумкинлигини айтганди. Шу билан бирга, у режадан ташқари йиғилишлар ўтказиш зарурати йўқлигини таъкидлади.
Агар тўртта ҳудуд аҳолиси Россия таркибига кириш истагини билдирса, бу хоҳиш қўллаб-қувватланишини қайд этганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Изоҳ (0)