Қозоғистон чегара хизмати ходимлари ўтказиш пунктини четлаб ўтиб, чегарани бузиб кирган уч нафар россияликни қўлга олди, деб хабар бермоқда мамлакат Миллий хавфсизлик қўмитаси.
«Қонунбузарлар ўз хатти-ҳаракатларини Россия ҳудудида ўтказилаётган қисман сафарбарликдан бош тортмоқчи бўлгани билан изоҳлади», — дейилади хабарда.
Ҳодиса 25 сентябрь куни Қўстаной вилояти бўйича чегара хизмати департаментига қарашли участкада юз берган. Уч россиялик сўроқ қилинганидан кейин ўз мамлакатига топширилади.
Муассаса эслатишича, айни пайтда чегарани қўриқлаш бўлинмалари ва ўтказиш пунктлари Қозоғистон чегара хавфсизлигини таъминлаш учун кучайтирилган режимда ишламоқда.
Шундан кейин Россиянинг Грузия, Финляндия, Мўғулистон билан чегараларида тирбандликлар юзага келгани ҳақида маълум қилинди, авиакомпаниялар эса Истанбул, Ереван, Бокуга тўғридан-тўғри рейслар учун чипталарни сотиб тугатди.
Қозоғистон давлат даромадлари қўмитаси маълум қилишича, 21 сентябрдан буён Россиядан енгил автомобиллар оқими 20 фоизга ўсган, энг кўп гавжумликлар Ақтўбе, Атирау, Ғарбий Қозоғистон ва Қўстаной вилоятларида кузатилган.
Қозоғистон Миллий хавфсизлик қўмитаси Чегара хизмати 23 сентябрь куни республикага кириб келаётган россияликлар сони ўсгани ҳақида хабар берган ва вазият алоҳида назорат остига олинганини маълум қилган эди.
Еврокомиссия вакили сафарбарликдан қочаётган россияликларни ўз ҳудудига киритиш-киритмаслик қарори ҳар бир давлатнинг ўзига ҳавола этилишини айтганди.
Россияда нималар бўляпти?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Мавзуга доир:
Изоҳ (0)