Шольц Украинага танкларни юбориш хавфи ҳақида гапирди. Берлин Россия билан тўғридан-тўғри уруш хавфидан чўчимоқда

Германия Украинага танклар юбормоқчи эмас, чунки бу можаро ривожланишида хавфли қадам бўлиши мумкин. Бу ҳақда Германия канцлери Олаф Шольц New York Times газетасига берган интервьюсида айтиб ўтди, дея хабар беради «Lenta.ru».

Шу тариқа у Германия нега Киевга танк етказиб бермаяпти, деган саволга жавоб берди.

«Бу жуда хавфли уруш. Биз Украинани қўллаб-қувватлаймиз. Биз буни НАТО ва Россия ўртасидаги урушга олиб келмайдиган тарзда амалга оширмоқдамиз, акс ҳолда бу фалокатли бўларди», — деди Шольц.

Украина президенти Владимир Зеленский аввалроқ Германияни Киевга танк етказиб беришни истамагани учун танқид қилган эди. Унинг таъкидлашича, Украина Берлиндан ҳарбий ва молиявий кўмак учун миннатдор, аммо «ғалаба қозониши учун кўпроғи керак».