АҚШ маъмурияти Россия томонидан ядро қуроли қўлланилган тақдирда амалга ошириладиган ҳаракатлар режасини тузиб қўйган. Бу ҳақда АҚШ давлат котиби Энтони Блинкен CBS телеканалига берган интервьюсида маълум қилди.
Аммо у режа тафсилотларига тўхталмади.
Блинкеннинг баёноти Россия президенти Владимир Путиннинг мамлакат ҳудудий яхлитлигига нисбатан хавф пайдо бўлган тақдирда, Москва ядро қуролидан фойдаланиши мумкинлиги ҳақидаги гаплари фонида янгради. Ўзининг 21 сентябрь кунги мурожаатида қисман сафарбарлик ҳақида эълон қилаётиб, Путин Ғарб Россияга қарши «ядровий товламачилик» қўллаётганини айтганди.
«Мамлакатимиз ҳудудий яхлитлигига таҳдид пайдо бўлган тақдирда, Россия ва халқимизни ҳимоя қилиш учун, шубҳасиз, қўл остимиздаги барча воситалардан фойдаланамиз. Бу қуруқ таҳдид эмас… Бизга ядро қуроли билан товламачилик қиладиганлар билиб қўйиши керак, шамол йўналиши улар томонга қараб ўзгариши мумкин», — деган эди у.
Аввалроқ АҚШ президентининг Миллий хавфсизлик бўйича маслаҳатчиси Жейк Салливан Оқ уй Россияни ушбу турдаги қуролдан фойдаланиш ҳалокатли оқибатлари ҳақида огоҳлантирганини айтганди.
«Биз Кремлга тўғридан-тўғри, хусусий равишда, жуда юқори даражада, ядро қуролидан ҳар қандай фойдаланиш Россия учун ҳалокатли бўлишини, Қўшма Штатлар ва иттифоқчиларимиз кескин жавоб беришини айтдик. Биз бу нимага олиб келишини аниқ ва равшан таъкидлаганмиз», — деди Салливан.
Изоҳ (0)