Россиянинг Иркутск вилояти Усть-Илимск шаҳар ҳарбий комиссариатида сафарбарликка чақирилган маҳаллий фуқаро отишма содир этди. Бу ҳақда Baza Telegram-канали хабар бермоқда. Ҳарбий комиссар оғир яраланган.
Гувоҳларнинг сўзларига кўра, «Ҳозир ҳаммамиз уйга кетамиз», — дея 25 ёшли Зинин Руслан ҳарбий комиссар Александр Елисеевга қарата ўқ узган.
Дастлабки маълумотларга қараганда, Зинин бугун, 26 сентябрь куни сафарбар этилиши керак бўлган. Унинг ҳарбий комиссариатга қандай қилиб қурол билан кириб келгани ҳозирча тушунарсиз, дейилади хабарда.
Ҳарбий комиссар Елисеев айни пайтда касалхонага ётқизилган.
Россияда нималар бўляпти?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Дастлаб Россия ҳудудларидаги ҳарбий комиссарлар сафарбарлик бўйича армияга чақирилиши керак бўлган одамларга ўз шаҳри ёки туманини тарк этишни тақиқлаганди, бироқ 23 сентябрга келиб, уларнинг буйруқларида Россиядан чиқиш кетишга нисбатан тақиқлар пайдо бўлди.
Meduza манбалари маълум қилишича, ДХР, ЛХР ва Украинанинг Херсон ва Запорожье вилоятларидаги босиб олинган ҳудудларда «референдум» тугаганидан кейин сафарбарлик ёшидаги эркакларга Россиядан чиқиб кетиш тақиқланиши кутилмоқда. Тақиқ 28 сентябрь куни киритилиши мумкин.
Изоҳ (0)