Эронда ўн кундан бери давом этаётган намойишларда камида 41 киши ҳалок бўлди, юзлаб одамлар яраланди.
Кўплаб шаҳарларда, жумладан, Теҳронда хавфсизлик кучлари оломонга қарата ўт очди. Теҳрон полицияси турар жой бинолари деразаларига ўқ узди. Рашт шаҳрида эса гувоҳлар ва ижтимоий тармоқлардаги видеоларга кўра, квартираларга кўзни ёшлатувчи газ ўрнатилган портлаткичлар улоқтирилган.
Мамлакатда 2009 йилдан бери ҳукуматга қарши энг йирик намойишлар 16 сентябрь куни, 22 ёшли Маҳса Аминийнинг ўлимидан кейин бошланган эди. Қиз ҳижобни «нотўғри» ўрагани учун ахлоқ полицияси томонидан ҳибсга олинган, сўнг полиция участкасидан касалхонага олиб кетилган ва у ерда вафот этган эди. 24 сентябрь куни намойишлар Эроннинг 80 та шаҳрига тарқалди.
Эрон президенти Иброҳим Раисий буйруғи билан аёлларга қарши қаратилган репрессияга жавобан, айниқса, ёш эронликлар орасида бир неча ойдан бери чуқур норозилик кайфияти ва ғазаб кучаймоқда. Намойишчилар, шунингдек, коррупция, иқтисодий жиҳатдан нотўғри бошқарув ва диссидентларга қарши йиллар давомида олиб борилаётган тазйиқларга қарши чиқмоқда.
Маҳаллий хавфсизлик кучлари бир неча кун давом этган шиддатли тўқнашувлардан сўнг орқага чекингач, мамлакатнинг ғарбий чегараси яқинидаги кичик, асосан, курдлар истиқомат қиладиган Ошнавие шаҳри намойишчилар томонидан эгаллаб олинди. Аҳоли шаҳарга кираверишда тўсиқлар ўрнатган.
Нью-Йоркдаги Бирлашган Миллатлар Ташкилоти Бош Ассамблеясида нутқ сўзлаб қайтган Эрон президенти Раисий 23 сентябрь куни Теҳрон аэропортида қилган чиқишида ҳукумат «ҳеч бир шароитда мамлакат ва жамият хавфсизлигининг таҳдид остида қолишига йўл қўймаслигини» айтди.
Изоҳ (0)