Қирғизистон ва Тожикистон ўз чегараларида вазиятни тартибга солиш ҳақида протокол имзолади. Бу ҳақда Қирғизистон Давлат миллий хавфсизлик қўмитаси раҳбари Қамчибек Ташиев маълум қилди, деб ёзади «Кабар» агентлиги.
Томонлар учрашуви 25 сентябрь куни «Кизил-Бел» назорат-ўтказиш пунктида бўлиб ўтди. Қирғизистон ва Тожикистон Давлат миллий хавфсизлик қўмиталари раҳбарлари Қамчибек Ташиев ва Саймўмин Ятимов тегишли ҳужжатни имзолади.
«Ҳужжатнинг асосий мақсади — чегарадаги сўнгги низони ҳал қилиш, унинг оқибатларини бартараф этиш ва янги зиддиятларга йўл қўймаслик», — деди Ташиев.
Маҳаллий ўзини ўзи бошқарув органларига ва куч тузилмаларига тегишли топшириқлар берилди. «Уларнинг бажарилишини шахсан назорат қиламиз», — дея таъкидлади Қирғизистон МДХҚ раҳбари.
14 сентябрь куни Қирғизистон ва Тожикистон ўртасидаги муносабатлар кескинлашган эди. Давлатлар бир-бирини ўт очишни тўхтатиш режимини бузганликда айблаган ва чегара қишлоқлари бир неча кун ўққа тутилган.
19 сентябрь куни кечқурун Қирғизистон ва Тожикистон чегарадаги вазиятни барқарорлаштириш ва икки давлат ўртасида тинчлик ўрнатиш тўғрисида протокол имзолади. Бироқ 21 сентябрь куни Тожикистон Қирғизистон чегарада провокацияларни амалга ошираётганини маълум қилди.
Низо оқибатида Қирғизистоннинг 59 нафар фуқароси ҳалок бўлди, яна 140 киши жароҳатлар олди. Тожикситоннинг талафоти 41 кишига етди.
Мавзуга доир:
- «Мен аввалгилар каби хиёнаткор эмасман» — Садир Жапаров чегара масаласини ҳал қилиш учун ердан воз кечмаслигини айтди
- Садир Жапаров БМТ минбаридан туриб Эмомали Раҳмон ўзи рози бўлган тамойиллардан оғаётганини маълум қилди
- Қирғизистон Тожикистон билан тўқнашувда 500 та бино вайрон бўлганини маълум қилди
Изоҳ (0)