Тошкент шаҳри ИИББ ЙҲХБ пойтахтнинг айрим кўчаларида транспорт воситаларининг юқори тезлигини соатига 60 километргача чеклаш масаласини шаҳар кенгашига киритгани, аммо таклиф қабул қилинмагани ҳақида маълумот берилганди. Халқ депутатлари шаҳар кенгаши ҳолат юзасидан муносабат билдирди.
Унда таъкидланишича, ижтимоий тармоқларда Халқ депутатлари Тошкент шаҳри кенгаши томонидан Тошкент шаҳрининг айрим кўчаларида транспорт воситаларининг юқори ҳаракатланиш тезлигини соатига 60 километргача камайтириш юзасидан киритилган таклиф рад этилгани ҳақида асоссиз маълумотлар тарқалмоқда.
Халқ депутатлари Тошкент шаҳри кенгашининг 2022 йил 16 сентябрдаги етмишинчи сессияси кун тартибида шаҳар ИИББ ЙҲХБнинг Тошкент шаҳрининг айрим кўчаларида транспорт воситаларининг юқори ҳаракатланиш тезлигини соатига 60 километргача камайтириш тўғрисидаги таклифи кўриб чиқилган.
Депутатлар томонидан юқорида киритилган таклифни муҳокама қилиш жараёнида алоқадор идора ва ташкилотлар билан биргаликда ҳар томонлама ва чуқур ўрганиш зарурлиги, бунда шаҳар кўча ва йўл тармоғи, аҳолининг ҳаракатланиш оқимлари йўналишларини ва шу каби бир қатор омилларни ҳисобга олиш зарурлиги билдирилган.
Баён этилганлардан келиб чиқиб, депутатлар томонидан мазкур таклиф рад этилмаган бўлиб, кенгашнинг навбатдаги сессияси муҳокамасига қайта киритиш тўғрисида қарор қабул қилинганлиги маълум қилинади.
Изоҳ (0)