Олий Мажлис Қонунчилик палатаси депутати Расул Кушербаев 6 сентябрь куни ижтимоий тармоқдаги саҳифаси орқали видеомурожаат йўллаб, унда сурхондарёлик фуқаро уни онасидан сўкканини билдирганди. Депутатнинг маълум қилишича, ҳақорат бўйича иш судда кўриб чиқилди.
Қайд этилишича, 23 сентябрь куни жиноят ишлари бўйича Бойсун тумани судида фуқаро Санжар Султоновнинг ҳақорат қилганига доир иш кўриб чиқилган. Кушербаев ЖИБ Юнусобод тумани судидан онлайн иштирок этган.
Суд Султоновни Маъмурий жавобгарлик тўғрисидаги кодекснинг 41-моддасига асосан БҲМнинг ўттиз баравари (9 миллион сўм) миқдорида жаримага тортиш ҳақида қарор қабул қилган. Якунда депутатга фуқаролик суди орқали ҳуқуқбузар Султоновдан маънавий зарар ундириши мумкинлиги тушунтирилган.
Ҳақорат жавобгарликка сабаб бўлади, ҳақоратдан тийилайлик, — дейди депутат.Ўзи нима бўлганди?
Фуқароларга қулайлик нуқтаи назаридан Telegram’да «Кушербаевга мурожаат» номли канал очилган. У ерда мурожаатлар актуаллигига қараб эълон қилиб борилади ва масъул идора-ташкилотлар уларни ўрганиб, ҳал қилиш чораларини кўради.
Депутат канал очилишидан мақсад фақат фуқароларга ёрдам бериш эканини айтиб, кимнидир сўкиш ёки ҳақорат қилиш назарда тутилмаганини билдирган.
Унинг маълум қилишича, Сурхондарё вилояти Бойсун тумани депутати Зоҳида Ўзбекованинг турмуш ўртоғи бўлган фуқаро Санжар Султонов каналдаги мурожаат юзасидан ижтимоий тармоқ орқали Расул Кушербаевни ҳақорат қилган.
Санжар Султонов унга тегишли жойи бўлмаса ҳам, каналдаги мурожаат сабаб мени депутат сифатида вафот этган онамни ҳақорат қиляпти. Чидаб бўлмайдиган даражада, тўғриси. Мен бунга шунчаки қараб туролмайман. Агар бошқа жойда бўлганида, ўзим билардим нима қилишни. Лекин у киши бутун тармоқда мени сўкиб, тағин раҳматли онамни ҳақоратлаяптими, билиши керакки, бу мамлакатда бировни ҳақоратлаш шунчаки жавобсиз қолиб кетмайди.Санжар Султонов, сиз қонун олдида жавоб берасиз. Депутатни, фуқарони ҳақорат қилганингиз учун. Мен бу ишни шунчаки ташлаб қўймайман. Максимал чора кўрилиб, жавоб берасиз, мен сизни шу жавобгарликка тортқизаман, — деганди у Facebook’даги саҳифасига жойлаган видеосида.Қонунчилик палатаси депутати шахсан ички ишлар вазирига ариза юборган. Фуқаронинг жазо олгани эса бутун халққа кўрсатилади.
Бундан ташқари, Расул Кушербаев кузатувчиларига бошқа бир фуқарони ҳақорат қилмаслик кераклигини, бу учун қонунда тегишли жазо чоралари борлигини эслатиб ўтган.
Бойсунлик фуқаролар бўлса, ўша оғзи шалоқ фуқарога етказиб қўйинглар: у одам қонун олдида жавоб беради. Агар қонунларимиз ишласа, албатта, у киши жазога тортилади, — дея сўзларини тугатган депутат.
Изоҳ (0)