Халқ депутатлари Самарқанд вилояти кенгашининг навбатдаги сессиясида вилояти прокурори Жаҳонгир Ҳотамов президентнинг «Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ҳамда бошқа давлат дастурлари ижроси устидан назоратни кучайтиришга доир қўшимча чора-тадбирлар тўғрисида»ги қарорининг ижроси юзасидан ҳисобот берди. Бу ҳақда ЎзА хабар қилди.
«Ҳудудий штаб ўзининг устувор фаолиятини қурилиш соҳасидаги қонун бузилишларни аниқлаш ва унинг оқибатлари билан курашишга эмас, балки бу борадаги содир этилиши мумкин бўлган жиноий хатти-ҳаракатлар ҳамда ҳуқуқбузарликларни олдини олишга қаратиб, хато-камчиликларни ўз вақтида бартараф этишга йўналтириб келмоқда. Мазкур жараёнларда ҳар бир лойиҳанинг асослилиги ўрганилиб, лойиҳа ҳужжатларига 230 та ҳолатда ортиқча ёки заруриятсиз киритилган 58,5 миллиард сўм маблағ мақбуллаштирилди», — дейди Ҳотамов.
Хусусан, Пайариқ туманидаги 59-умумтаълим мактабини реконструкция қилиш бўйича «Самкадастр» МЧЖ томонидан 1 миллиард 420,4 миллион сўмга ишлаб чиқилган лойиҳа-смета ҳужжатларида ора ёпма плиталар сони ошириб кўрсатилиши оқибатида объект қиймати сунъий равишда 119,7 миллион сўмга ошириб кўрсатилган. Ургут туманидаги 121-мактабнинг фасад қисми сувоқ ишларида 145 миллион сўм, 81-мактабда нархларни ошириб кўрсатиш орқали 47 миллион сўм ва Каттақўрғон шаҳридаги 11-мактабни реконструкция қилиш объекти сметасида материал харажатларига 206 миллион сўм ортиқча харажатлар кўрсатилгани аниқланиб, бартараф этилган. Шунингдек, вазифаларнинг жойлардаги ижроси аҳволи, муаммоларни аниқлаш ва бартараф этиш мақсадида вилоят штаби раҳбари бошчилигидаги ишчи гуруҳ томонидан барча ҳудудлар ўрганиб чиқилди.
Ҳудудлардаги вазият ҳамда дастурлар ижроси масъул ходимлар иштирокида муҳокама қилиниб, вазифасини лозим даражада бажармаган ва қонун бузилишига йўл қўйган 42 нафар масъуллар интизомий, 197 нафари маъмурий жавобгарликка тортилган. Қўпол қонун бузилиш ҳолатлари юзасидан 17 та жиноят иши қўзғатилган ва жиноят оқибатида етказилган 3 миллиард 878 миллион сўмлик зарар ундирилган.
Мисол учун, «Обод қишлоқ» дастури доирасида «Қобил Қурувчи Сервис» МЧЖ томонидан Пастдарғом туманидаги 21-мактабда олиб борилган қурилиш-монтаж ишлари давомида 587,2 миллион сўм маблағ талон-торож қилингани ҳолати юзасидан жиноят иши қўзғатилиб, суднинг ҳукми билан айбдор шахсларга нисбатан жазо муқаррарлиги таъминланган ва етказилган зарар тўлиқ ундирилган. Қурилиш ишлари амалга оширилиши кўзда тутилган барча объектлар пудратчилари «Шаффоф қурилиш» миллий ахборот тизимидаги электрон тендер савдолари орқали танланиши, қурилиш-таъмирлаш жараёнларида манфаатлар тўқнашувига йўл қўйилмаслиги, қурилиш ишларида муаллифлик, техник ва давлат назорати олиб борилишини таъминлаш ва аниқланган камчиликлар ҳақида ҳудудий штабга ахборот бериб бориш тизими йўлга қўйилган. Ушбу йўналишдаги ўрганишларда вилоятдаги 11 та қурилиш-пудрат ташкилоти томонидан статистика, солиқ, бандлик ва бошқа идораларга сохта ҳисоботлар топширилиши оқибатида «Шаффоф қурилиш» миллий ахборот тизими орқали ўтказилган 27 та тендер савдоларида жами 219 миллиард сўмлик объектлар қурилишида ғолибликни қўлга киритганлиги маълум бўлган.
Мазкур ҳолатлар юзасидан жиноят иши қўзғатилиб, айбдорларга тегишли чоралар кўрилган. Вилоятда қурилиш ишларида сифатни таъминлаш ва турли қинғир ҳаракатларнинг олдини олиш мақсадида дастурга киритилган ижтимоий соҳа объектларида видео кузатув камералари ўрнатилган. Онлайн режимда ишловчи кузатув камераларининг ёзуви бир ой давомида сақлаш имконияти яратилган ва кузатув камералари вилоят штабига интеграция қилинган.
Изоҳ (0)