Садир Жапаров БМТ минбаридан туриб Эмомали Раҳмон ўзи рози бўлган тамойиллардан оғаётганини маълум қилди

Қирғизистон президенти Садир Жапаров Нью-Йоркда БМТ Бош Ассамблеяси 77-сессиясида нутқ сўзлаб, Тожикистон президенти Эмомали Раҳмон ўзи рози бўлган принциплардан оғаётганини маълум қилди. Бу ҳақда Sputnik хабар бермоқда.

Жапаров эслатишича, 1991 йил охирида МДҲни ташкил қилиш тўғрисида Олмаота декларацияси қабул қилинган. Ҳужжатда мустақил давлатлар бир-бирининг ҳудудий яхлитлигини ва мавжуд чегаралар мустаҳкамлигини тан олиши ва ҳурмат қилиши белгилаб қўйилган. Унда мамлакатлар «фуқаролик жамияти ва миллатлараро розиликни сақлаб қолиш учун ўз масъулияти»ни англаши ҳақида айтилган.

«МДҲнинг 1994 йил 15 апрелдаги ‘МДҲга аъзо мамлакатлар суверенитети, ҳудудий яхлитлиги ва чегаралари дахлсизлигига риоя қилиш тўғрисида’ги Москва декларациясида ушбу тамойил Тожикистон президенти Эмомали Раҳмон томонидан тасдиқланган. У ушбу ҳужжатга ўз имзосини қўйиб, унга розилигини билдирган. Энди эса у ушбу тамойилдан оғаётгани афсусланарли ҳолатдир», — дея таъкидлади Жапаров.

Хусусан, президент сўнгги воқеаларни эслатди.

«Аввал эришилган келишувларнинг барчасини бузиб, Тожикистон томони қирғиз-тожик давлат чегарасининг бутун периметри бўйлаб жойлашган чегара ва фуқаролик объектларига ҳужум қилди», — дея қўшиб қўйди у.

Шунингдек, Жапаров БМТ бош котиби Антониу Гутерриш билан учрашиб, чегарадаги тўқнашувларни муҳокама қилди, бош котиб Бишкек ва Душанбени мулоқотга ва вазиятни тинчлантиришга чақирди.

Қирғиз-тожик чегарасидаги қуролли низо 14 сентябрь куни бошланди. Иккала томонда ҳам қурбонлар ва жабрланганлар бор. Томонлар бир-бирини қуролли тажовузда айбламоқда.

Қирғизистон Соғлиқни сақлаш вазирлиги маълумотларига кўра, тўқнашувлар оқибатида 59 киши ҳалок бўлган. ФВВ хабар беришича, Боткен вилоятида, дастлабки маълумотлар бўйича, 294 та турар жой ва объектлар вайрон қилинган ёки ёқиб юборилган. Зиддият зонасидан 136 мингдан ортиқ фуқаро эвакуация қилинган.

Айни пайтда Қирғизистон ва Тожикистон ўртасида ўт очишни тўхтатиш ва қуролли кучларни чегарадан олиб кетиш ҳақидаги келишув амал қилмоқда.