Чеченистон раҳбари Рамзан Қодиров Украинадаги ҳарбий операция иштирокчилари янги тактикага ўтаётганини ва «ўзини бошқа уринтирмоқчи эмаслиги»ни маълум қилди. Янги тактика ҳақидаги тафсилотларни у келтириб ўтмади.
Қодировнинг айтишича, ҳарбий операциялар ўтказиш бўйича Чеченистон тезкор штаби бошлиғи Магомед Даудов билан ўзгаришлар тафсилотларини муҳокама қилган. Telegram-каналдаги постига Чеченистон раҳбари видео илова қилган бўлиб, унда Даудов билан режа ёки харитани кўздан кечираётганини кўриш мумкин.
«Душман тез орада янги қасос режасининг улар учун жуда оғир бўлган оқибатлари билан тўқнашади. Бизнинг аввалги барча ҳаракатларимиз энди уларга болаларча шўхликлар бўлиб туюлади… Бу хабарга ўзи учун ёмон белги деб қараб, ҳаётини қутқариш учун тўғри хулосалар чиқарганларгина ютади. Тайёрланинг ва кўз-қулоқ бўлиб туринг», — деб ёзди Қодиров.
Россия ҳарбий операцияси бошланганидан буён Қодиров Украинага жанговар ҳаракатларда қатнашиш учун чечен жангчилари юборилгани ҳақида бир неча марта маълум қилган.
Рамзан Қодиров 14 сентябрь куни Россия ҳудудларини мустақил равишда сафарбарлик эълон қилишга чақирганди. Чеченистон раҳбари, шунингдек, Россияда ҳарбий ҳолат эълон қилиниши зарурлигини айтганди.
Эртаси куни эса Россия минтақалари раҳбарлари «мустақил сафарбарлик» эълон қилиши ва Украинадаги урушга юбориш учун кўнгиллиларни тайёрлаши кераклигини айтди.
Изоҳ (0)