Киев назорати остида бўлмаган ҳудудларда яшовчи украиналиклар Россияга қўшилиш ҳақидаги референдумларда овоз берса, беш йилгача озодликдан маҳрум қилиниши мумкин. Бу ҳақда Украина бош вазири ўринбосари Ирина Верешчук маълум қилди, деб ёзади «РБК».
Унинг аниқлик киритишича, овоз бериш Украина Жиноят кодексининг Украина ҳудудий яхлитлиги ва дахлсизлигига тажовуз қилиш ҳақидаги моддаси таъсири остига тушади.
«Ҳарбий вақт режими тўғрисидаги қонунга мувофиқ, Украина ҳудудида референдумлар тақиқланган. Референдум ташкилотчилари ва иштирокчилари кодекснинг 111-моддасига кўра жазоланади — бу мол-мулкни мусодара қилган ҳолда, 15 йилгача муайян лавозимларни эгаллаш ёки муайян фаолият билан шуғулланиш ҳуқуқидан маҳрум қилиниб, 5 йилдан 10 йилгача озодликдан маҳрум қилиш демакдир», — дея қўшиб қўйди Верешчук.
Референдумда қатнашганлик учун жиноий жавобгарлик ҳақида Верешчук икки ҳафта аввал ҳам огоҳлантирганди, ўшанда овоз беришни ташкиллаштирганлар ва унда қатнашишга даъват этганларга 12 йилгача муддат берилишини айтганди.
20 сентябрь куни ДХР, ЛХР ҳамда Запорожье ва Херсон вилоятларининг Россия кучлари назорати остида бўлган қисмлари Россия таркибига кириш ҳақида референдумлар ўтказилишини бир вақтда эълон қилди. Овоз бериш 23—27 сентябрь кунлари бўлиб ўтади.
Бир қатор Ғарб мамлакатлари, хусусан, Франция ва Канада референдумлар натижаларини тан олмаслигини маълум қилди. АҚШ уларни суверенитет тамойилларига нисбатан ҳақорат деб атади. Евроиттифоқ Россияга қарши янги санкциялар киритиш ҳақида таҳдид қилди. Украина президенти Владимир Зеленский референдумлар ҳақидаги хабарлардан кейин Киевнинг позицияси ўзгармаганини таъкидлади.
Изоҳ (0)