Навоий шаҳрида фуқаронинг ишини ижобий ҳал қилиб бериш учун пора олган адвокатлар қўлга олинди. Бу ҳақда Давлат хавфсизлик хизмати хабар қилди.
Қайд этилишича, Навоий шаҳридаги адвокатлар ҳайъати адвокати Ҳ.Қ. маҳаллий фуқарога нисбатан ички ишлар органлари томонидан қўзғатилиб, тергов қилинаётган жиноят ишини юқори лавозимда ишловчи танишлари орқали унинг фойдасига ижобий ҳал қилиб беришни ваъда қилган. Эвазига 8 минг доллар талаб қилган.
Адвокат сўралган пул маблағидан 7,5 минг долларини олган вақтида ДХХнинг Навоий вилояти бўйича бошқармаси ва ИЖҚК вепартаментининг ҳудудий бошқармаси ходимлари томонидан ашёвий далиллар билан ушланган.
Терговга қадар текширув ҳаракатлари давомида Ҳ.Қ. олган пулидан 1500 долларини ўзининг улуши сифатида олиб, қолган қисмини ҳамкасби — Навоий шаҳридаги адвокатлик фирмаси адвокати Ф.Н.га бериши кераклиги маълум бўлган.
Тезкор тадбир давом эттирилиб, у ҳам 6 минг долларни олган вақтида ушланган.
Ҳозирда мазкур ҳолат юзасидан Ҳ.Қ. ва Ф.Н.ларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)