Navoiyda fuqaroning ishini ijobiy hal qilib berish uchun 7,5 ming dollar pora olgan advokatlar ushlandi

Navoiy shahrida fuqaroning ishini ijobiy hal qilib berish uchun pora olgan advokatlar qo‘lga olindi. Bu haqda Davlat xavfsizlik xizmati xabar qildi.

Qayd etilishicha, Navoiy shahridagi advokatlar hay’ati advokati H.Q. mahalliy fuqaroga nisbatan ichki ishlar organlari tomonidan qo‘zg‘atilib, tergov qilinayotgan jinoyat ishini yuqori lavozimda ishlovchi tanishlari orqali uning foydasiga ijobiy hal qilib berishni va’da qilgan. Evaziga 8 ming dollar talab qilgan.

Advokat so‘ralgan pul mablag‘idan 7,5 ming dollarini olgan vaqtida DXXning Navoiy viloyati bo‘yicha boshqarmasi va IJQK вepartamentining hududiy boshqarmasi xodimlari tomonidan ashyoviy dalillar bilan ushlangan.

Tergovga qadar tekshiruv harakatlari davomida H.Q. olgan pulidan 1500 dollarini o‘zining ulushi sifatida olib, qolgan qismini hamkasbi — Navoiy shahridagi advokatlik firmasi advokati F.N.ga berishi kerakligi ma’lum bo‘lgan.

Tezkor tadbir davom ettirilib, u ham 6 ming dollarni olgan vaqtida ushlangan.

Hozirda mazkur holat yuzasidan H.Q. va F.N.larga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.