Лионель Мессининг 2020 йилда «Барселона» билан музокаралари вақтида қўйган шартлари тафсилоти маълум бўлди.
Аргентиналик футболчи «кўк-анорранглилар»дан 2020 йилда шартнома имзолаганлик учун 10 миллион евро бонус, пандемия даврида маошлар қисқаргани учун компенсация ва товон пулини 10 минг евро бўлишини сўраган.
El Mundo нашрининг хабарига кўра, бу Месси қўйган талабларнинг ҳаммаси эмас. Ҳужумчи, шунингдек, ўз оиласи ва Луис Суареснинг оиласи учун «Камп Ноу»дан шахсий ложа ва Рождество арафасида оиласи билан Аргентинага учиши учун чартер рейс талаб қилган.
Ўша вақтдаги «Барселона» президенти Хосеп Бартомеу Леонинг талабларини қабул қилган, бироқ 700 миллионлик товон пулини 10 минг еврога тушириш талабини бажармаган. Шунингдек, клуб молиявий аҳволи яхшилангандан сўнг 10 миллион евро бонус пулини тўлаб беришини ваъда қилган.
Худди шу келишмовчиликлар туфайли томонлар музокарани давом эттиролмаган ва Месси ўзини трансферга қўйишларини сўраган.
Лионель Месси 2021 йил август ойида «Барселона»ни эркин агент сифатида тарк этди ва Франциянинг «ПСЖ» жамоаси билан шартнома имзолади. У «кўк-анорранглилар» сафида умумий ҳисобда 778 та ўйин ўтказиб, 672 та гол ва 305 та голли узатмани амалга оширган.
Изоҳ (0)