Донецк халқ республикаси жамоатчилик палатаси ДХР раҳбари Денис Пушилин ва халқ кенгашига Россия таркибига қўшилиш бўйича референдум ўтказиш ташаббуси билан мурожаат тайёрлади, деб ёзади «РБК». Палата аъзолари бу ташаббусни бир овоздан қўллаб-қувватладилар.
«Биз ҳаммамиз Донбасснинг Россия эканлигини узоқ вақтдан бери биламиз ва ҳис қиламиз. Биз саккиз йилдан бери бунинг учун курашамиз, бунинг учун ҳар куни уйларимиз, кўчаларимиз, шифохоналаримиз, мактабларимиз ва болалар боғчаларимизга қилинган зарбаларни бошдан ўтказамиз. Давлатларимиз ўртасидаги мавжуд бўлмаган чегарани, у узоқ вақтдан бери қалбимиздан ўчирилганидек, ўчириш ва Донецк Халқ Республикасининг Россия Федерацияси таркибига қўшилиши масаласи бўйича референдум ўтказиш вақти келди», — дейилади мурожаат матнида.
Ташаббус ЛХРнинг шунга ўхшаш таклифидан сўнг пайдо бўлди. Шу билан бирга, ЛХР фуқаролик палатаси раҳбари Алексей Карякин референдум «бир кунда битадиган иш эмас» эканлигини ва ҳозирча уни ўтказишнинг тахминий санасини айта олмаслигини билдирганди.
ДХР раҳбари Денис Пушилин 7 сентябрь куни республикада референдум ўтказиш вақт масаласи эканлигини, чунки «озод қилиш операцияси» давом этаётганини айтган эди. Луганск вилоятининг деярли бутун ҳудуди Россия қўшинлари ва республика кучлари назорати остида бўлган ЛХРдан фарқли ўлароқ, ДХРда вазият бошқача, минтақа ҳудудининг ярмидан кўпроғигина Москва назоратида бўлиб турибди.
«Биз доимо Россияга содиқ бўлганмиз. 2014 йилда Донецк Халқ Республикасининг давлат мустақиллиги бўйича референдум ўтказар эканмиз, эртами-кечми ватанимиз ҳисобланган Улкан мамлакатга қайтиш орзуйимизни амалга оширадиган иккинчи референдум албатта бўлишини билардик, — деган эди Пушилин 7 сентябрда. Унинг қўшимча қилишича, «тортиб олинган» ерларнинг ҳар бир қаричи учун жавоб бериш фурсати яқинлашган.
Мавзуга доир:
Изоҳ (0)