Эрон полициячилари мамлакат ғарбида 22 ёшли Маҳса Аминий дафн қилинганидан кейин бошланган норозилик акциясини тарқатиб юбориш учун кўзни ёшлантирувчи газдан фойдаланди, қиз ахлоқ полицияси томонидан қўлга олинганидан кейин вафот этганди, деб ёзади «РБК».
Маҳса Аминий Теҳронга ўтган ҳафта келган ва акаси билан бирга метродан чиқаётганида ахлоқ полицияси томонидан ҳибсга олинган. Бунга унинг ҳижобни нотўғри ўрагани сабаб бўлган. 1979 йилги Ислом инқилобидан кейин эронлик аёллар учун ҳижоб тақиш мажбурий бўлиб келмоқда.
Al Jazeera телеканали маълумотларига кўра, Эрон ҳукуматининг қиз юрак хуружидан вафот этгани ҳақидаги баёнотига қарамасдан, у туғилиб-ўсган Секкезе шаҳрида ҳамда Эрон ғарбидаги бошқа шаҳарларда кенг кўламли норозилик намойишлари бошланган. Одамлар маъмурий бинолар атрофида тўпланиб, ҳукуматга қарши шиорларни баралла айтган, баъзи аёллар эса бирдамлик белгиси сифатида ўз рўмолларини ечиб, осмонга отган. Бундан ташқари, ижтимоий тармоқларда қизлар флешмоб уюштириб, ҳижобларини ёқиб юбормоқда ва сочларини кесиб ташламоқда.
Маҳса Аминийнинг қариндошлари Al Jazeera’га маълум қилишича, қизнинг саломатлиги билан боғлиқ муаммолар бўлган. «У касалхонага келтирилди ва бир неча кун комада ётди. Сўнг уни ҳаётни таъминлаш қурилмаларидан узиб, ўлди деб эълон қилишди. Аслида нималар юз берганини текширишни бутун мумлакат талаб қилмоқда», — деди қизнинг қариндошлари.
Маҳса Аминийнинг вафоти юзасидан АҚШнинг юқори мансабли шахслари ҳам изоҳ берди. Хусусан АҚШ президентининг миллий хавфсизлик бўйича ёрдамчиси Жейк Салливан Twitter’да қизнинг ахлоқ полицияси томонидан калтакланиши оқибатида ҳалок бўлгани ҳақида ёзди ва Эрон инсон ҳуқуқларини бузишда айблади. АҚШнинг Эрон бўйича махсус вакили Роберт Малли қизнинг вафотини «даҳшатли» деб атади ва айбдорларни топишга чақирди.
Эрон Ислом Республикаси Ҳуқуқ-тартибот кучлари Ибрат патрули (ахлоқ полицияси) — Эрон Ички ишлар вазирлиги назорати остидаги ҳуқуқ-тартибот органи. 2005 йилда алоҳида тузилма сифатида ажралиб чиққан. Ибрат патрули вазифаларига Эрон фуқаролари ва чет элликларнинг жамоат жойларида шариат бўйича муносиб кийиниб юришини таъминлаш киради.
Аёлларнинг бошини ёпмай юриши, рўмол ёки ҳижобни нотўғри тақиши, авратни ёпмайдиган кийим кийиши, баъзи ҳолларда эса «бегона эркак билан яқиндан мулоқот қилиши» уларни ҳибсга олиш учун асос бўлиб ҳисобланади.
Аввалроқ Эрон Маданият ва ислом вазирлиги аёлларнинг рекламаларда суратга тушишини тақиқлаганди, бу Эроннинг Domino компанияси бир аёл бошига рўмол шарф ташлаб, автомобилни бошқариб кетаётгани, сўнг эса шоколадли қиём билан қопланган музқаймоқни егани акс этган роликни чиқарганидан кейин юз берганди.
Изоҳ (0)