Қозоғистон Халқ партияси раиси ва Нурсултон Назарбоевнинг собиқ маслаҳатчиси Ермухамет Ертисбаев маълум қилишича, собиқ президент пойтахтга Остона номининг қайтарилишига қарши бўлмаган, деб ёзади «Ulysmedia.kz».
«Нурсултон Назарбоев мутлақо қарши бўлмаганини аниқ биламан — айнан у шаҳарнинг асосчиси, меъмори сифатида пойтахтга Остона деб ном берган, бу унинг ташаббуси эди, ва у узоқ вақт мобайнида пойтахтнинг қайта номланишига қаршилик кўрсатганди. YouTube’да бор, унинг ҳамма гапларини топишингиз мумкин. Шунинг учун мана шу нуқтаи назардан, ўйлайманки, бундай қарор кутилган эди», — деди Ертисбаев.
Бугун, 19 сентябрь куни Қозоғистон пойтахти номини Нур-Султондан Остонага ўзгартириш ҳақидаги фармон кучга кирди.
Мамлакат президенти Қосим-Жўмарт Тўқаев шаҳар қайта номланиши ҳақидаги қонунни 17 сентябрь куни, мамлакат Конституциясига тузатишлар киритилиши тўғрисидаги қонун билан биргаликда, имзолаганди.
Пойтахтга 2019 йилда Қозоғистон биринчи президенти Нурсултон Назарбоев шарафига ном берилган эди, ўшанда шаҳарнинг номини ўзгартиришни Тўқаевнинг ўзи таклиф қилганди. Ундан аввал пойтахт Остона деб аталган ва унга яна шу ном қайтиб берилди.
1998 йилгача республика пойтахти Олмаота шаҳри бўлган, ҳозирги пойтахт эса Акмола деб аталган.
Айни пайтда Қозоғистон пойтахтида шаҳарнинг эски — Нур-Султон номи ёзилган ёзувлар демонтаж қилинмоқда.
Изоҳ (0)