Бирлашган Миллатлар Ташкилоти Москва ва Киев асирларни «ҳаммасига ҳамма» форматида алмашиш бўйича келишиб олишига умид қилмоқда, деди БМТ бош котиби Антониу Гутерриш.
«Асирлар алмашинуви — ижобий ҳолат. Бу асирларнинг ўзлари, уларнинг оилалари учун ҳам азоб-уқубатни камайтиради. Менининг позициям шундаки, кўплаб одамларнинг ҳаётидаги ушбу драмага барҳам бериш учун «ҳаммасига ҳамма» алмашинувини амалга ошириш идеал чора бўлади», — деди Гутерриш.
БМТ бундай алмашинувга кўмаклашишга тайёрми, деган саволга бош котиб шундай жавоб берди: «Одатда биз асирларни алмашишда қатнашмаймиз – бу Халқаро Қизил хоч қўмитасининг ваколати».
«Албатта, биз Россия ва Украинанинг бу борада имкон қадар кенгроқ келишувга эриша олишини истардик», — дея қўшимча қилди у.
Украина ва Россия асирлар алмашинуви ҳақида охирги марта 29 июнь куни хабар берганди. Ўшанда томонлар «144 га 144» форматида ҳарбий хизматчиларни алмашган. Шундан сўнг Россия Мудофаа вазирлиги Киев ва Москва уруш бошланганидан бери 27 марта асирлар ва ҳалок бўлганларнинг жасадларини алмаштирганини маълум қилди.
16 сентябрь куни Зеленский шундай шарт қўйганди: агар Россия украиналик ҳарбий асирларни озод қилса, Украина аммиак транзитига рухсат беради. «Россия Федерациясидан бизнинг ҳудуд орқали аммиак етказиб берилишига қаршиман. Мен бунга фақат асирларимиз эвазига рухсат берган бўлардим», — деди у ва ўз фикрини аллақачон БМТга етказганини таъкидлади.
Кремль Зеленскийнинг таклифини рад этди. «Одамлар ва аммиак бир хил нарсами?» — деди Россия президентининг матбуот котиби Дмитрий Песков.
Изоҳ (0)