«Дарё» нашри 19 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Шавкат Мирзиёев 14 та туман ҳокимини ишдан олди
Ўзбекистонда йил бошидан Самарқанд 900 минг, Фарғона 850 минг, Андижон 650 минг ички сайёҳларни қабул қилиб, бу борада пешқадам бўлди. Бу ҳақда президент матбуот котиби хабар қилди.
Қайд этилишича, айрим вилоят, туман ва шаҳарлар натижалари яхши эмас.
Хизмат кўрсатиш салоҳиятидан келиб чиқиб ишларни етарли даражада ташкил этмагани учун Қашқадарё вилояти ҳокими М.Азимовга ҳайфсан берилди.
Шаҳрисабз, Яккабоғ, Қамаши, Касби, Косонсой, Тўрақўрғон, Арнасой, Кармана, Ургут, Шеробод, Олтинсой, Гулистон, Янгийўл, Хива туманлари ҳокимлари бугун ишдан олиниб, ўзгариш қилиш учун уларга уч ой синов муддати берилади.
Қирғизистон ва Тожикистон чегарадаги йўлларни очишга келишиб олди
Тожикистон ва Қирғизистон ишчи гуруҳлари 18 сентябрь куни «Гулистон» чегара пунктида учрашиб, давлатлар чегарасидаги йўлларни очиш ва транспорт қатновини таъминлашга келишиб олди. Бу ҳақда Тожикистоннинг ушбу чегара пункти жойлашган Сўғд вилояти раиси матбуот хизмати хабар қилди.
Эслатиб ўтамиз Қирғизистон ва Тожикистон чегарасида 16 сентябрга ўтар кечаси авж олган можаро натижасида,Бишкек 46 киши ҳалок бўлганини, Душанбе эса қурбонлар сони 38 га яқин эканини, уларнинг орасида тинч аҳоли вакиллари ҳам борлигини даъво қилди.
Айни пайтдаги ҳолат юзасидан Қирғизистон президенти Садир Жапаров халққа мурожаат қилиб: Қирғизистон Тожикистон билан келишмовчиликларни тинч йўл билан ҳал қилишни режалаштирмоқда, дея маълум қилган.
Жапаровнинг сўзларига кўра, икки мамлакат муносабатларидаги муаммолар улар ўртасидаги ҳудудий чегаралар тартибга солинмаганидан келиб чиқмоқда.
Байден Хитой Тайванга ҳужум қилса, АҚШ қўшинлари орол ҳимоясида иштирок этишини айтди
АҚШ президенти Жо Байден CBS журналистининг тегишли саволига жавоб бериб: агар Хитой томонидан кенг кўламли ҳужум бўлса, АҚШ ҳарбийлари Тайванни ҳимоя қилишини айтди.
Тайван масаласи АҚШ Конгресси Вакиллар палатаси спикери Нэнси Пелосининг оролга ташрифи чоғида кескинлашган.
ХХР турли мамлакатлар расмий делегацияларининг Тайванга ташрифини унинг суверенитети ва ҳудудий яхлитлигини бузиш сифатида баҳолайди.Глобал инфляция билан боғлиқ вазият қандай?
Глобал инфляция жорий йилнинг учинчи чорагида энг юқори чўққисига чиқади ва кейин пасайишни бошлайди. Бу ҳақда Focus Economics таҳлилчилари прогноз қилмоқда.
Таҳлилчиларнинг 60 фоизга яқини асосий проинфляция хавфини Россия газининг Европага етказиб беришнинг тўлиқ тўхтатилиши деб атайди
Яна 22 фоизи Россия ва Украина ўртасида тинчлик келишувига эришиш буғдой нархининг кескин пасайишига ва Россия газининг Европага етказиб берилишининг ошишига олиб келиши мумкинлигини, 3 фоизи эса Эрон билан ядровий келишувга эришиш нефть нархини пасайтириши мумкинлигини таъкидлади.
Изоҳ (0)