Япониянинг август ойида қайд этилган савдо камомади ҳажми 2,8 триллион иенани (тахминан 19,6 миллиард доллар) ташкил этди. Бу ҳақда Япония Молия вазирлигига таяниб «ТАСС» хабар бермоқда.
Август ойидаги савдо камомади мамлакатдаги тегишли кўрсаткичнинг рекорд даражаси бўлди.
Ўтган ойда Япония импорти 2021 йилнинг шу даврига нисбатан 49,9 фоизга ўсиб, пул кўринишида 10,879 триллион иенани (тахминан 76 миллиард доллар) ташкил этди.
Ўз навбатида, экспорт ҳажми 22,1 фоизга ўсиб, 8,061 триллион иена (56,3 миллиард долларга яқин) бўлди.
Бундан ташқари, 2021 йил августига нисбатан Япония томонидан сотиб олинган нефть партияси нархи 90,3 фоизга, LNG (суюлтирилган газ) 140,1 фоизга ва кўмир 241 фоизга ошган.
Япониянинг савдо тақчиллиги охирги 13 ой давомида сақланиб қолмоқда. Бунга иенанинг долларга нисбатан сўнгги 24 йилдаги энг оаст даражага тушиб кетиши ва жаҳон бозоридаги нефть нархи сабаб бўлмоқда.
Жорий йилнинг биринчи ярим йиллигига кўра, Ўзбекистонда савдо тақчиллиги 5,5 млрд долларни ташкил қилади.
Аввалроқ Япон иенаси 1998 йилдан бери энг паст даражага тушгани ҳақида хабар берилган эди.
Изоҳ (0)