Шанхай Ҳамкорлик Ташкилотининг (ШҲТ) илғор концепциялари ва тинчликсеварлиги унинг аъзолари сафини кенгайтиришга ёрдам берди, келажакда янада кўпроқ мамлакатлар ташкилотга аъзо бўлиши кутилмоқда, деди халқаро муносабатлар бўйича хитойлик эксперт.
ШҲТ 2001 йилда Шанхайда Хитой, Қозоғистон, Қирғизистон, Россия, Тожикистон ва Ўзбекистон томонидан ташкил этилган. Ҳиндистон ва Покистон 2017 йилда ташкилотга тўлиқ аъзо сифатида қўшилган.
Ҳозирда ШҲТга аъзо давлатлар ҳудуди дунё қуруқлик майдонининг тўртдан бир қисмини эгаллайди ва уларнинг умумий аҳолиси дунё аҳолиснинг қарийб ярмини ташкил қилади.
2021 йилда ШҲТга аъзо давлатлар иқтисодиётларининг умумий ҳажми қарийб 23,3 триллион АҚШ долларини ташкил этиб, жаҳон ялпи ички маҳсулотининг қарийб чорак қисмига тенг бўлди. ШҲТ доирасида турли соҳалардаги ҳамкорлик барча томонлар учун барқарор ривожланиш муҳитини яратди, иқтисодий ва маданий соҳаларда ҳам самарали натижалар олиб келди, дейди экспертлар.
«ШҲТ терроризм ва экстремизмга аниқ таъриф берилган биринчи халқаро ташкилотдир. Ташкилот терроризмни йўқ қилиш бўйича концепция ва ҳаракатда ўз изланишларини амалга оширди. ШҲТ ҳар бир аъзоси бир-бирини танийдиган катта оилани барпо этди. Бу таҳсинга сазовор бўлган катта ютуқ», — деди Хитой халқаро тадқиқотлар институтида Евросиё тадқиқотлар директори Ли Сигуо.
2021 йилда Хитой ва ШҲТга аъзо бошқа давлатлар ўртасидаги товар айирбошлаш ҳажми аввалги йилнинг шу даврига нисбатан 40 фоизга ошиб, 343,1 миллиард АҚШ долларини ташкил этди. Хитой таъсисчи аъзо сифатида ШҲТ ривожига кўмаклашиш тарафдори эканини таъкидлаб, «Шанхай руҳи»нинг замонавий маъносини илғор ғоялар ва аниқ ҳаракатлар билан бойитди.
Қайд этилишича, 15—16 сентябрь кунлари Самарқанд шаҳрида бўлиб ўтадиган ШҲТ саммитида Эроннинг ташкилотга аъзо бўлиш тартибини илгари суриш билан бир қаторда, Беларусни қабул қилиш жараёни бошланиши, шунингдек, тегишли мамлакатларга мулоқот бўйича ҳамкорлар мақоми берилиши кутилмоқда.
Изоҳ (0)